Հաշվի առնելով «Իշխան» և «Սիգ» ձկնատեսակների ձվադրման ժամանակահատվածը, ձկների բնականոն վերարտադրությունն ապահովելու նպատակով «Սևանի ՃՈ», «Դիլիջանի» հենակետերում, Սևանա լճի ափամերձ և ջրային հայելու տարածքից, Բնապահպանության և ընդերքի տեսչական մարմնի, «Սևան» ազգային պարկ» ՊՈԱԿ-ի և Ոստիկանության աշխատակիցների համատեղ իրականացված վերահսկողական կանխարգելիչ միջոցառման արդյունքում դեկտեմբերի 17-ի դրությամբ առգրավվել է 3623 հատ ձուկ՝ 1280 կգ ընդհանուր քաշով։ Այս մասին հայտնում են Բնապահպանության և ընդերքի տեսչական մարմնից։
Սևանա լճից դուրս են բերվել 22 հատ պոլիէթիլենային ձկնորսական ցանցեր՝ յուրաքանչյուրը 100 մետր երկարությամբ, ինչպես նաև «Սիգ» տեսակի ձկներ:
Առգրավված ձկները Բնապահպանության և ընդերքի տեսչական մարմնի աշխատակիցների կողմից հանձնվել են «Սևանի հոգեկան առողջության կենտրոն» ՓԲԸ-ին, «Գավառի» մանկատուն, «Դիլիջանի գիշերօթիկ դպրոց», Դիլիջանի քաղաքապետարան, որը հանձնել է Արցախի հանրապետությունից ժամանած ժամանակավոր բնակություն հաստատած ընտանիքներին և ՀՀ պաշտպանության նախարարությանը:
Բնապահպանության և ընդերքի տեսչական մարմինը հորդորում է զերծ մնալ անօրինական գործողություններից։
Տեղեկացնենք նաև, որ խստացված ստուգայցերը շարունակվում են։
Հիշեցնենք, որ այս տարի պիլոտային ծրագրով Սևանից օրինական ձևով թույլատրվում է որսալ 200 տոննա սիգ։
