Ադրբեջանական լրատվամիջոցները կեղծ լուրեր են հրապարակել Արցախում «զինծառայողների մահվան» մասին։ Այս մասին հաղորդագրություն է տարածել Արցախի ՊԲ մամուլի ծառայությունը։
«Ադրբեջանական լրատվամիջոցներում՝ մասնավորապես armiya.az կայքում, որը ստեղծված օրվանից ի վեր զբաղվում է ընդհանրապես հայկական զինված ուժերով և մասնավորապես Արցախի պաշտպանության բանակում տեղ գտնող ‹‹մահվան ելքերով արտակարգ պատահարների մասին›› մտացածին տեղեկատվությունների հրապարակմամբ, հուլիսի 11-ին հերթական ապատեղեկությունն է տարածել, ըստ որի՝ հուլիսի 2-ին Արցախում տեղակայված ‹‹1-ին գնդում անհայտ պատճառներով զինծառայող է մահացել, իսկ ավելի ուշ պարզվել է, որ նրան սպանել է համածառայակիցը՝ անձնական թշնամական հարաբերությունների հողի վրա»»,-ասվում է հաղորդագրության մեջ:
Արցախի Հանրապետության պաշտպանության նախարարությունը իրազեկում է, որ նշված տեղեկատվությունն իրականությանը չի համապատասխանում և կոչ է անում հայրենական լրատվամիջոցներին ուշադրություն չդարձնել պաշտպանության բանակի մասին պարբերաբար ապատեղեկատվություններ տարածող վերոնշյալ ադրբեջանական քարոզչական կենտրոնի հրապարակումներին, իսկ բանակում տեղ գտնող իրադարձությունների մասին գրելիս օգտվել բացառապես Արցախի ՊՆ մամուլի ծառայության պաշտոնական լրահոսից: