Հոկտեմբերի 27-ին Թուրքիայի և Ռուսաստանի արտաքին գործերի նախարարներ Մևլութ Չավուշօղլուն և Սերգեյ Լավրովը հեռախոսազրույցներ են ունեցել։ Այս մասին
հայտնում է «ՏԱՍՍ»-ը՝ հղում անելով Թուրքիայի արտաքին գործերի նախարարության աղբյուրին:
«Մեր նախարարը բանակցություններ է վարել Ռուսաստանի Դաշնության արտաքին գործերի նախարար Սերգեյ Լավրովի հետ: Քննարկվել են Լեռնային Ղարաբաղի, Սիրիայի և Լիբիայի հետ կապված հարցեր»,- ասել է գործակալության աղբյուրը:
Հոկտեմբերի 25-ի երեկոյան Ադրբեջանը և Հայաստանը Միացյալ Նահանգների միջնորդությամբ համաձայնության են եկել Լեռնային Ղարաբաղի հակամարտության գոտում մարդասիրական նպատակներով նոր հրադադարի մասին, որն ուժի մեջ է մտել հոկտեմբերի 26-ին: ԱՄՆ նախագահ Դոնալդ Թրամփը կարծիք է հայտնել, որ Վաշինգտոնի միջնորդությամբ հաստատված հրադադարը պահպանվում է:
Լեռնային Ղարաբաղում իրավիճակը սրվել է սեպտեմբերի 27-ին: Նախկինում հակամարտության կողմերը երկու անգամ արդեն հայտարարել էին հրադադարի համաձայնություն ձեռք բերելու մասին, բայց մարտերը շարունակվում են: