ՀՀ նախագահ Արմեն Սարգսյանի հրամանագրով ՌԴ ԶՈՒ 3 զինծառայողներ պարգևատրվել են Մարտական ծառայության մեդալով:
«Հիմք ընդունելով վարչապետի միջնորդությունը՝ համաձայն Սահմանադրության 136-րդ հոդվածի, ինչպես նաև «Հայաստանի Հանրապետության պետական պարգևների և պատվավոր կոչումների մասին» օրենքի 5.3-րդ հոդվածի 1-ին մասի.
Ծառայողական պարտականությունները կատարելիս ցուցաբերած խիզախության և նվիրումի համար Ռուսաստանի Դաշնության զինված ուժերի ներքոհիշյալ զինծառայողներին պարգևատրել Մարտական ծառայության մեդալով՝
Յուրի Վիկտորի ԻՇՉՈՒԿԻՆ՝ ուղղաթիռային էսկադրիլիայի ուղղաթիռային օղակի հրամանատար, մայոր (հետմահու)
Ռոման Վասիլիի ՖԵԴԻՆԻՆ՝ ուղղաթիռային էսկադրիլիայի ուղղաթիռային օղակի ավագ տեխնիկ-հրահանգիչ, ավագ լեյտենանտ (հետմահու)
Վլադիսլավ Սերգեյի ԳՐՅԱԶԻՆԻՆ՝ ուղղաթիռային էսկադրիլիայի ուղղաթիռային օղակի օդաչու-օպերատոր, ավագ լեյտենանտ»:
Հիշեցնենք, որ ռուսական Մի-24 ուղղաթիռը խոցվել էր նոյեմբերի 9-ի երեկոյան Հայաստանի երկնքում՝ Նախիջեւանի հետ սահմանի մոտ գտնվող Երասխ բնակավայրի մոտ։ Ուղղաթիռը խոցվել է մարտական գործողությունների գոտուց դուրս։ Ադրբեջանը խոստովանել է, որ սխալմամբ է խոցել ուղղաթիռը եւ ներողություն է խնդրել միջադեպի համար: