ԱՄՆ պետքարտուղար Մայք Պոմպեոն շնորհավորական ուղերձ է հղել Հայաստանի Հանրապետության անկախության 29-րդ տարեդարձի առիթով:
«Ամերիկայի Միացյալ Նահանգների անունից շնորհավորում եմ հայ ժողովրդին Անկախության օրվա առթիվ, որը նշանավորում է անկախության հռչակումն ու Խորհրդային Միության կազմից դուրս գալը։ Միացյալ Նահանգները հանձնառու է շարունակել երկկողմ գործընկերությունը՝ ամրապնդելու մեր ժողովուրդների կապերը, որոնք խարսխվում են ընդհանուր ժողովրդավարական արժեքների և խաղաղության ու բարեկեցության ցանկությունների շուրջ»,- նշել է ԱՄՆ պետքարտուղարը։
Պոմպեոն նշել է, որ Միացյալ Նահանգները ողջունում է Հայաստանի շարունակական հանձնառությունն ուղղված իրավունքի գերակայության ամրապնդմանը, անկախ դատական համակարգի ձևավորմանը և տնտեսական ու ներդրումային հնարավորությունների մեծացմանը։
«Մենք գովելի ենք համարում թափանցիկության, պատշաճ դատական ընթացակարգերի և քաղաքացիների հաշվետվողականության մեծացման ճանապարհով կոռուպցիայի դեմ պայքարին ուղղված Հայաստանի ընթացիկ ջանքերը և կշարունակենք աջակցել Ձեզ այդ աշխատանքներում»,- նշել է Պոմպեոն։
Պոմպեոն ընդգծել է, որ ԱՄՆ-ը հավատարիմ է մնում Լեռային Ղարաբաղի հակամարտության խաղաղ կարգավորման հարցում օգնելու իրենց հանձնառությանը և կողմերին կոչ է անում հնարավորինս շուտ վերսկսել բովանդակային բանակցությունները Մինսկի խմբի համանախագահության ներքո։
«Այս տարի նոր կորոնավիրուսի հետևանքով աշխարհի առաջ նոր մարտահրավերներ ծառացան, սակայն հպարտ ենք, որ համավարակի դեմ պայքարին միտված մեր սերտ համագործակցությունը հանգեցրեց մեր ժողովուրդների միջև գործակցության առավել ամրապնդմանը։ Շնորհավորելով հայ ժողովրդին տոնի առթիվ՝ մաղթում եմ խաղաղություն, ազատություն ու բարեկեցություն»,- ասվում է ԱՄՆ պետքարտուղարի ուղերձում։