Կարծում եմ՝ պաշտպանական կողմին հաջողվեց դատարանին հիմնավորել, որ Առուշ Առուշանյանի ձերբակալումը հիմնավոր չէ ու բացարձակ ապօրինի է։ Այս մասին լրագրողների հետ զրույցում հայտարարել է Գորիսի քաղաքապետ Առուշ Առուշանյանի փաստաբան Արմեն Մելքոնյանը՝ հայտնելով, որ դատարանը հեռացել է խորհրդակցական սենյակ։
Նա նաև հայտնեց, որ մի քանի ժամերի ընթացքում դատարանը կհրապարակի որոշումը: Արմեն Մելքոնյանի խոսքով, նպատակ կար Առուշ Առուշանյանին պարզապես մեկուսացնելու Գորիսի համայնքից։
«Այն հարցադրումները, որոնք մեր կողմից բարձրաձայնվել են, ուղղվեցին նաև քննիչին, որոնք, սակայն, անպատասխան մնացին, որովհետև քննիչն այդ փաստերի դեմ ոչինչ չէր կարող ներկայացնել։
«Մինչ այս պահը վարույթն իրականացնող մարմինը չունի տվյալ՝ Առուշանյանի կոչով կազմակերպվողը ապօրինի՞ , թե՞ օրինական հավաք է, բայց կասկածում է, թե Առուշանյանը ապօրինի հավաք կազմակերպելու փորձ է արել»,-ասաց փաստաբանը՝ անհեթեթություններ համարելով բոլոր հիմքերը։
Փաստաբանն ընդգծեց, որ Գորիսի քաղաքապետի ձերբակալման մեջ քաղաքական ենթատեքստ է տեսնում։
Հիշեցնենք, որ դեկտեմբերի 21-ին Գորիսի քաղաքապետ Առուշ Առուշանյանը հարուցված քրեական գործի շրջանակներում բերման էր ենթարկվել։
