Չի բացառվում, որ առաջիկա օրերին վարչապետ Նիկոլ Փաշինյանն աշխատանքային այցով մեկնի Մոսկվա։ Այս մասին հայտնում է «Ազատություն»-ը: Կայքի հետ զրույցում վարչապետի մամուլի խոսնակ Մանե Գևորգյանը տեղեկությունը ոչ հերքել է, ոչ էլ՝ հաստատել՝ չփոխանցելով այլ մանրամասներ։
Վերջինս չի մեկնաբանել նաև Մոսկվայում Ադրբեջանի նախագահ Ալիևի հետ հնարավոր հանդիպման մասին շրջանառվող տեղեկությունները։
Ավելի վաղ Հայաստանի նախկին նախագահի փեսա, Վատիկանում նախկին դեսպան Միքայել Մինասյանը հայտարարել էր, որ հունվարի 11-ին նախատեսված է Հայաստանի վարչապետի հանդիպումը Ադրբեջանի նախագահի հետ: Մինասյանի խոսքով՝ նշված հանդիպման նախօրեին ՀՀ ԱԱԾ ղեկավար Արմեն Աբազյանին «խիստ գաղտնիության մթնոլորտում ուղարկում են Բաքու»:
«Նրա առջեւ խնդիր է դրված՝ ձեւականացնել եւ գրավոր արձանագրել բոլոր այն խայտառակ զիջումներն ու կորուստները, որոնք արդեն արվել են բանավոր պայմանավորվածությունների հիման վրա, ինչպես նաեւ պարտավորություններ ստանձնել հետագայի համար», – հայտարարել է նախկին դիվանագետը: