Ադրբեջանի կողմից Հայաստանի տարածքում ռուսական Մի-24 ուղղաթիռի խոցման վայրում ուղղափառ մատուռ կկառուցվի: Այս մասին հայտարարություն է տարածել «Խաղաղություն» միջազգային մարդասիրական հիմնադրամի մամուլի ծառայությունը:
«2021թ. հունվարի 6-ին՝ Սուրբ Ծննդյան տոնին, տեղի կունենա Սուրբ Իլյա մարգարեի ուղղափառ մատուռի կառուցման առաջին աղյուսի տեղադրման արարողությունը: Այն կկառուցվի ռուս օդաչուների հիշատակին»,- ասված է հաղորդագրությունում:
Ուղղափառ մատուռը կկառուցվի Երասխում գտնվող բլրի վրա, որտեղ և նոյեմբերի 9-ին ընկել էր Ադրբեջանի կողմից խոցված ռուսական Մի-24 ուղղաթիռը:
Նոյեմբերի 14-ին Ռուսաստանի նախագահ Վլադիմիր Պուտինն ադրբեջանական զինված ուժերի կողմից խոցված ռուսական Մի-24 ուղղաթիռի հրամանատար Յուրի Իշչուկին (հետմահու), ավագ լեյտենանտ Ռոման Ֆեդինին (հետմահու) և վիրավորված ավագ լեյտենանտ Վլադիսլավ Գրյազինին պարգևատրել է Արիության շքանշանով:
Հիշեցնենք, որ 2020թ.նոյեմբերի 9-ի երեկոյան՝ եռակողմ հայտարարության ստորագրումից մի քանի ժամ առաջ, Հայաստանի օդային տարածքում ռուսական մարտական ուղղաթիռ էր խոցվել, ինչի հետևանքով երկու ռուս օդաչու էր զոհվել: Ուղղաթիռն ընկել էր Երասխավան գյուղից ոչ հեռու գտնվող ձորը:
Օրերս հայտնի դարձավ, որ ռուս ռազմական քննիչները Հայաստանի և Ադրբեջանի սահմանին Մի-24 ռազմական ուղղաթիռի կործանման գործը վերավորակավորել են ավելի ծանր հոդվածով:
