Արցախի արտաքին քաղաքականության հարցերը մնացել են նույնը, սակայն տարածաշրջանային իրադրությունը ստիպել է նոր տարրեր ներմուծել։ Այս մասին նշել է Արցախի ԱԳ նախարար Դավիթ Բաբայանը «Հանրային» հ/ը-ի եթերում՝ հավելելով, որ որպես առանցքային հարցեր՝ մնում են Արցախի Հանրապետության ճանաչումը, երկկողմ հարաբերությունների զարգացումը, դրան գումարվել է անվտանգության և սուբյեկտայնության ամրապնդումը։
Բաբայանը, անդրադառնալով Ալիևի հայտարարությանը, թե Լեռնային Ղարաբաղի հիմնախնդիր այլևս գոյություն չունի, նշել է, որ դա նոր հայտարարություն չէ, քանի որ Ադրբեջանը միշտ էլ մերժել է հայկական Արցախի գոյությունը, նրա անկախության անընդունելիությունը։
«Սակայն նույնիսկ ճակատագրական այս կորուստներից հետո Արցախը կա, և աշխարհաքաղաքական համատեքստում այս հարցը դեռ լուծման կարիք ունի։ Սուբյեկտայնության պահպանումը պահանջում է, որ «վիրավորված, վերակենդանացման բաժանմունքում» գտնվող Արցախը կարողանա ապաքինվել»,-նշել է արցախցի պաշտոնյան։
Ըստ Բաբայանի՝ Ադրբեջանը 5 տարի հետո չի ընդդիմանա ռուս խաղաղապաhների ներկայությանը, քանի որ կա ռեգիոնալ տերության գործոնը և հիմնախնդրի կարգավորման ծավալը։
«Խաղաղապահ առաքելության ժամկետը կլինի շատ երկար, չեմ կարող ասել` կոնկրետ քանի տարի, բայց 5 տարով չի սահմանափակվի»,- նշել է նա։
Հիշեցնենք, որ նոյեմբերի 9-ին Հայաստանի վարչապետ Նիկոլ Փաշինյանը, Ադրբեջանի նախագահ Իլհամ Ալիևը և Ռուսաստանի նախագահ Վլադիմիր Պուտինը ստորագրել են հայտարարություն, որում 2020 թվականի նոյեմբերի 10-ին Մոսկվայի ժամանակով 00:00-ից Լեռնային Ղարաբաղի հակամարտության գոտում հայտարարվում է կրակի և բոլոր ռազմական գործողությունների լիակատար դադարեցում:
Ադրբեջանն ու Հայաստանը կանգ են առնում իրենց զբաղեցրած դիրքերում։ Լեռնային Ղարաբաղի շփման գծի երկայնքով և Լեռնային Ղարաբաղը Հայաստանի Հանրապետությանը կապող միջանցքի երկայնքով տեղակայված է Ռուսաստանի Դաշնության խաղաղապահ զորախումբը:
