Սյունիքի Հոթ բնակավայրում ավտովթարի հետևանքով տուժածներին ռուս խաղաղապահներն են օգնել

Հունվարի 10-ին, Սյունիքի մարզի Հոթ բնակավայրից ոչ հեռու Երևան-Մեղրի մայրուղու վրա, «ՈւԱԶ» մակնիշի մեքենայով տեղացի մի ընտանիք վթարի է ենթարկվել: Առաջին օգնություն ցուցաբերել են ռուս խաղաղապահները, որոնք դեպքի ականատեսներն են եղել։

Լուրն Armenia Today-ի հետ զրույցում հաստատեց ԱԻՆ մամուլի խոսնակ Աննա Բաղդասարյանը՝ նշելով, որ ահազանգ չի եղել ԱԻՆ, դրա համար էլ դեպքի վերաբերյալ մեր զանգից հետո են իմացել ու պարզել, որ ոստիկանությունից այդ մասին իրենց ինչ-ինչ պատճառներով չեն հայտնել։

Ինչևէ՝ վթարված 30-35 տարեկան ամուսնական զույգն իրենց երկու անչափահաս երեխաների հետ տեղափոխվել է Գորիս քաղաքի հիվանդանոց:
Մեծահասակները ստացել են ոտքի փակ կոտրվածքներ և գանգուղեղային վնասվածքներ, երեխաները՝ կապտուկներ ու քերծվածքներ։