«Քառյակ Մեդիա» ընկերության համահիմնադիր, վերլուծաբան Կարեն Բեքարյանի փաստաբան Գոռ Միքայելյանն իր Facebook-ի էջում գրել է.
«Ես Արամ Սարգսյանի պաշտպանը չեմ, բայց պարոն Բեքարյանի կալանքի միջնորդությանը կից նյութերից առերևույթ կերպով պարզ է, որ ինչպես Կարեն Բեքարյանին, Արա Սաղաթելյանին, այնպես էլ Արամ Սարգսյանին ֆեյսբուքյան որևէ ֆեյքի հետ կարելի է կապել այնքանով, որքանով յուրաքանչյուրիս ու բոլորին: Ակնհայտ է, որ վարույթ իրականացնող մարմինն ակնհայտ սխալ պատկերացումներ ունի VPN-ների և IP հասցեների աշխատանքի վերաբերյալ, որոնք նշված համակարգերի աշխատանքի վերաբերյալ մինիմալ գիտելիք կամ պատկերացում ունեցող անձի մոտ ժպիտ են առաջացնում։
Էլ չեմ խոսում այս սխալ եզրակացությունների հիման վրա արված իրարամերժ իրավաբանական որակումների (օրինակ՝ նույն գործողությունը որակվել է ՀՀ քրեական օրենսգրքի 226-րդ և 226.2-րդ հոդվածով, ինչն արգելված է ՀՀ քրեական օրենսգրքով) կամ Սահմանադրականի դատարանի որոշմամբ փաստացի գործողությունը դադարեցված 307.4-րդ հոդվածով մեղադրանքի առաջադրման մասին։
Հ.Գ. Էս պայմաններում Երևան քաղաքի առաջին ատյանի ընդհանուր իրավասության դատարանի «խեղճ» նախագահը առանց դատավորների նկատմամբ բիրտ ճնշումների ո՞նց ապահովեր պատվերի կատարումը»:
Հիշեցնենք նաև, որ «Գագիկ Սողոմոնյան» ֆեյսբուքյան ֆեյք լինելու կասկածանքով ձերբակալվել էին ԱԺ աշխատակազմի նախկին ղեկավար Արա Սաղաթելյանը, «Քառյակ Մեդիա» ընկերության համահիմնադիր, վերլուծաբան Կարեն Բեքարյան, ինչպես նաև քաղաքացի Մհեր Ավագյանը։ Ձերբակալությունների վերաբերյալ երեկ հաղորդագրություն էր տարածել Ազգային անվտանգության ծառայությունը: