Իրանի արտգործնախարարությունից անանուն մի աղբյուր հայտարարություն է տարածել` հերքելով ԱԳ նախարար Մոհամադ Ջավադ Զարիֆի՝ Թուրքիայի մասին հայտարարության վերաբերյալ շահարկումները: Այս մասին հաղորդում է Ermenihaber-ը։
Այդ հայտարարության մեջ նշվում է, որ Զարիֆին վերագրվող պնդումներն անհիմն են և չունեն պատասխանի արժանի լրջություն:
Նշենք, որ մամուլում լուրեր են շրջանառվել, թե Թուրքիայի պետական «Anadolu» լրատվական գործակալության թղթակցի հարցին ի պատասխան, Զարիֆը հակաթուրքական բնույթի հայտարարություններ է հնչեցրել:
Սաուդական «Al Arabiya» հեռուստաալիքի սոցցանցի հաշիվներից մեկում հրապարակվել էր Թուրքիայի վերաբերյալ Զարիֆի հայտարարությունը. «Մենք մերժում ենք Թուրքիայի ռազմական ներկայությունն Իրաքում և Սիրիայում ու սխալ ենք համարում այս ուղղությամբ տարվող քաղաքականությունը»: Այդ պնդումը տարածվել էր մամուլում և սոցցանցերում:
Նույն ժամանակահատվածում Իրանի արտգործնախարարը Sputnik-ին տված հարցազրույցում հետևյալ դիտարկումներն էր արել, որոնք, սակայն, խեղաթյուրված են ներկայացվել տարբեր լրատվականներում:
«Մենք կարծում ենք, որ Սիրիայում և Իրաքում ուժեր ունեցող Թուրքիայի վարած քաղաքականությունը ոչ միայն չի օգնում իր անվտանգության ապահովմանը, այլև սպառնում է տարածաշրջանի անվտանգությանը»:
Զարիֆի խոսքով՝ Թուրքիայում ահաբեկչական կազմակերպությունների պատճառով առկա ու հասկանալի վախերը հաղթահարելու լավագույն միջոցը ոչ թե այլ երկրների տարածքներ ուժեր փոխադրելն է, այլ այն, որ Սիրիայի և Իրաքի բանակներն իրենց ուժերը տեղակայեն սահմանային գոտիներում»:
