Կառավարությունը Մարդու իրավունքների պաշտպանի ֆինանսական անկախությունը վերացնող նախագիծը հետ է վերցրել Ազգային ժողովից: Այս մասին իր Facebook-յան էջում գրել է ՀՀ ՄԻՊ Արման Թաթոյանը:
«Այդ նախագիծը հակասահմանադրական էր՝ բովանդակությամբ և ընթացակարգային կոպիտ խախտումներով: Հատկանշական է, որ նախագծի հետ կապված միջազգային կառույցները հստակ նշել էին, որ փոփոխությունը բացասական էր ազդելու Պաշտպանի հեղինակության, աշխատանքի արդյունավետության վրա, ինչպես նաև կարող էր հանգեցնել միջազգային ամենաբարձր «Ա» կարգավիճակի հատուկ վերանայման, քանի որ առկա կարգավորումը միջազգային լավագույն փորձ է»,-նշել է Թաթոյանը:
Հիշեցնենք, որ ՀՀ կառավարության նախագիծը քննադատությունների առիթ էր դարձել: Նշենք, որ նախագծի հեղինակը Ֆինանսների նախարարությունն էր: