Ավագանու անդամ Դավիթ Խաժակյանը իր կարճատև, բայց հագեցած քաղաքական կարիերայի ընթացքում առնվազն մի բան լավ է յուրացրել. պարզ փաստերը ներկայացնել այնպես, որ հանրության որոշակի հատվածի մեջ «սենսացիոն բացահայտման» տպավորություն ստեղծվի: Այս մասին իր ֆեյսբուքյան էջում գրել է Երևանի քաղաքապետի մամուլի խոսնակ Հակոբ Կարապետյանը։
«Առնվազն վերջին մեկ-մեկուկես տարվա պրակտիկայից լիքը օրինակներ կարելի է բերել (հիշենք թեկուզ «կամազգեյթ»-ի մեգապղպջակն ու «փո՛ղ են տվել, ժողովուրդ ջան, ոչ թե Կամազ» այդպես էլ օդում կախված դատարկ պնդումը): Այսօր էլ պարոն Խաժակյանը նման մի գրառում է արել «Թաքցվել են պարգևավճարների վերաբերյալ փաստաթղթերը» հնչեղ վերնագրի ներքո»,- գրել է Կարապետյանը։
Խոսնակը հիշեցրել է նախորդ տարվա փետրվարի իր մի գրառումը, որով հայտնում էր 2017 թվականին տրված 287 միլիոն դրամի պարգևավճարները թաքցնելու մասին, Խաժակյանը «բացահայտում է», որ հուլիսին Yerevan.am պաշտոնական կայքում չի հրապարակվել պարգևավճարներին վերաբերող 1(մեկ) կարգադրություն։
«Մինչդեռ ընդամենը օրեր առաջ իմ գործընկեր Հովսեփ Կուբատյանը հունիս ամսի կարգադրությունների մի խմբի չհրապարակվելու պատճառների մասին արդեն պարզաբանում տվել է հենց Դավիթ Խաժակյանին, այն է՝ քանի որ արձանագրային բաժնի աշխատակիցների զգալի մասը կորոնավիրուսի վարակի պատճառով բացակայում է, փաստաթղթերի մի ամբողջ տրցակ որոշակի ուշացմամբ է տեղադրվում կայքում (ոչ թե միայն մեկը կամ երկուսը, ինչպես փորձում է ներկայացնել Խաժակյանը): Ուստի հաշվի առնելով այս հանգամանքը և առավել ևս այն, որ պարգևավճարներին վերաբերող քաղաքապետի բոլոր կարգադրությունները վերջին մեկուկես տարվա ընթացքում անխտիր հրապարակվել են, «թաքցնելու» մասին պնդումը անհիմն է»,- գրել է Կարապետյանը։