ՄԱԿ-ի գլխավոր քարտուղար Անտոնիու Գուտերեշը կոչ է արել Երևանին և Բաքվին վերսկսել բանակցությունները Եվրոպայում անվտանգության և համագործակցության կազմակերպության (ԵԱՀԿ) հովանու ներքո՝ կայուն խաղաղության հասնելու համար: Այս մասին հայտնել է նրա պաշտոնական ներկայացուցիչ Ստեֆան Դյուժարիկը։
Գուտերեշը Հայաստանի և Ադրբեջանի կառավարություններին և ժողովուրդներին կոչ է արել կանգնել երկխոսության ուղու վրա, որը տանում է դեպի տարածաշրջանային խաղաղություն, կայունություն և բարգավաճում:
Գլխավոր քարտուղարն ընդգծել է, որ ՄԱԿ-ը պատրաստ է բավարարել հումանիտար կարիքները հակամարտությունից տուժած բոլոր շրջաններում և համապատասխան հարցում ստանալու դեպքում ավելացնել Հայաստանի և Ադրբեջանի օգնությունը:
Գուտերեշը ողջունել է Ռուսաստանի միջնորդությամբ նոյեմբերի 9-ին ձեռք բերված հրադադարի մասին համաձայնագիրը և կոչ արել «բոլոր կողմերին շարունակել կատարել դրա դրույթները, ինչպես նաև նրանց միջազգային պարտավորությունները, հատկապես միջազգային հումանիտար իրավունքի և մարդու իրավունքների պահպանման ոլորտում»:
Ռուսաստանի և Ադրբեջանի նախագահների, ինչպես նաև Հայաստանի վարչապետի համատեղ հայտարարության մեջ նշված պայմանավորվածությունների համաձայն, ս. թ. նոյեմբերի 10-ին Մոսկվայի ժամանակով ժամը 00: 00-ից հայտարարվել է Լեռնային Ղարաբաղում կրակի և բոլոր ռազմական գործողությունների լիակատար դադարեցում:
Լեռնային Ղարաբաղում կրակի դադարեցման և ռազմական գործողությունների վերահսկման համար տեղակայված է Ռուսաստանի Դաշնության խաղաղապահ զորախումբը:
Ռուսական զորակազմի հիմքը կազմում են Կենտրոնական ռազմական օկրուգի 15 առանձին մոտոհրաձգային բրիգադի (խաղաղապահ) ստորաբաժանումները: