Հայաստանի, Արցախի և Հայկական սփյուռքի տնտեսական, մշակութային, բարոյական և հոգևոր զարգացման համար մի շարք հանրային և հասարակական կազմակերպություններ այսօր համախմբման հուշագիր են ստորագրել։ Այս մասին Armenia Today-ին տեղեկացնում են նախաձեռնող խմբից։
«Այսօր հինգ կառույցներ համաձայնեցին ստորագրել համախմբման հուշագիր հետևյալի մասին։ Հաշվի առնելով հետպատերազմյան ժամանակաշրջանում ՀՀ-ում, Արցախում և Հայկական սփյուռքում ստեղծված ներքաղաքական իրավիճակը և դրանով պայմանավորված՝ հայ ժողովրդի տնտեսական, հոգևոր և բարոյական վիճակը ՀՀ-ում, Արցախում և Հայկական սփյուռքում և կարևորելով ստեղծված իրավիճակում ազգային միասնությունն ու համաձայնությունը՝ հանձնառություն են ստանձնել միաբանվելու և ստանձնելու պատասխանատվություն՝ համախմբելու ՀՀ և Հայկական սփյուռքի մտավոր, բարոյական և հոգևոր ներուժն ու ազգային ջանքերը՝ իրավիճակի հաղթահարման նպատակով, մշակելու հայոց ազգային գաղափարաբանության ձևավորմանը և ազգային ինքնիշխան, ժողովրդավարական, սոցիալական և իրավական պետության կերտմանը նպաստող ազգային ծրագրեր և ձեռնարկելու գործուն միջոցներ ՀՀ-ի, Արցախի և Հայկական սփյուռքի տնտեսական, մշակութային, բարոյական և հոգևոր զարգացման համար», – նշված է հաղորդագրության մեջ։
Հաղորդագրության մեջ նշված է, որ սույն հուշագրին կարող են միանալ Հայաստանի Հանրապետությունում, Արցախի Հանրապետությունում և Հայկական սփյուռքում գործող բոլոր հայկական հասարակական, քաղաքական, բարեսիրական և այլ կազմակերպությունները։
ՀԱՅ ԱԶԳԱՅԻՆ ԳՎԱՐԴԻԱ
ՀԱՅ ԱԶԳԱՅԻՆ ՃԱԿԱՏ
ՁԱՅՆ ՀԱՅՐԵՆԵԱՑ
ՄՏԱՎՈՐԱԿԱՆՆԵՐ ԽՈՐՀՈՒՐԴ
ՔԱՂԱՔԱՑԻԱԿԱՆ ԽՈՐՀՈՒՐԴ