Արցախի պետնախարարը հանձնարարել է մշակել բնակչության անվտանգությունն ապահովելու ծրագրեր

Արցախի պետական ​​նախարար Արթուր Հարությունյանը պաշտոնատար անձանց հանձնարարել է մշակել և իրականացնել ծրագրեր՝ ապահովելու բնակչության անվտանգությունը և մարզերից տարհանված բնակիչների տեղավորումը, հայտնում է Արցախի տեղեկատվական շտաբը։

Արտակարգ խորհրդակցության ժամանակ Հարությունյանը լսել է ոլորտի պատասխանատուների առաջարկները և հանձնարարականներ տվել ներքին ռեսուրսները համալրելու, ենթակառուցվածքների աշխատանքը վերսկսելու և մարդկանց սննդով մատակարարելու վերաբերյալ։

Սեպտեմբերի 19-ին Ադրբեջանը լայնամասշտաբ հարձակում է սկսել Արցախի Հանրապետության նկատմամբ։ Վերջին տվյալներով կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:

ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, որի պայմաններն էին՝ հայկական զինված կազմավորումները վայր են դնում զենքերը, լքում մարտական դիրքերն ու ամբողջությամբ զինաթափվում, հանձնվում է ողջ սպառազինությունն ու ծանր տեխնիկան։

Պայմանավորվածության համաձայն՝ սեպտեմբերի 21-ին Եվլախում տեղի էր ունեցել Արցախի և Ադրբեջանի ներկայացուցիչների հանդիումը։ Ստեփանակերտը հայտնել էր, որ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։