Արցախի երկու գյուղի բնակիչներ ցանկություն են հայտնել միասին տեղափոխվելու Տաշիրի շրջան, հայտնում է «Տաշիր» բարեգործական հիմնադրամը։
«Կեցավայրերի նախնական հաշվարկներով՝ պլանավորված քանակն արդեն զբաղված է: Մեր հետագա քայլերը լինելու են կեցավայրերի հնարավորինս կարճ ժամկետում բարեկարգումը և տրամադրումը մեր հայրենակիցներին: Կլինեն դեպքեր, երբ բարեկարգումը կսկսվի հյուրընկալելուց հետո, որպեսզի մարդիկ ունենան բնակվելու վայր»,- ասված է հաղորդագրության մեջ:
Սեպտեմբերի 27-ի ժամը 15։00-ի դրությամբ Արցախից Հայաստան է տեղափոխվել բռնի տեղահանված 50․243 անձ։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»: Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, որի պայմաններն էին՝ հայկական զինված կազմավորումները վայր են դնում զենքերը, լքում մարտական դիրքերն ու ամբողջությամբ զինաթափվում, հանձնվում է ողջ սպառազինությունն ու ծանր տեխնիկան։
Պայմանավորվածության համաձայն՝ սեպտեմբերի 21-ին Եվլախում տեղի էր ունեցել Արցախի և Ադրբեջանի ներկայացուցիչների հանդիպումը։ Ստեփանակերտը հայտնել էր, որ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
