2021 թվականի մայիսի 18-ին պարտադիր ժամկետային զինծառայող Նորիկ Մկրտչյանն անհետացել է մարտական դիրքերից։ 2021 թվականի մայիսի 24-ին Ռազմական ոստիկանության կողմից հարուցվել է քրեական գործ, հայտարարվել է միջպետական հետախուզում։ Մինչև այս պահը նա չի հայտնաբերվել, ընտանիքի հետ կապ չի հաստատվել։ Այս մասին ԱԺ-Կառավարություն հարցուպատասխանի ժամանակ հայտարարեց «Պատիվ ունեմ» խմբակցության պատգամավոր Տիգրան Աբրահամյանը։
Պատգամավորը նաև հայտնեց, որ ևս մեկ այդպիսի դեպք է եղել, որի մասին պաշտոնական հաղորդագրություն չկա։
«2021 թվականի նոյեմբերի 12-ին հայ-ադրբեջանական սահմանի ուղղություններից մեկով կրկին մարտական հենակետերից մեկում կորել է պայմանագրային զինծառայող։ Այս պահի դրությամբ նրա գտնվելու վայրի վերաբերյալ որևէ տեղեկություն չկա»,- նշեց նա։
Ըստ պատգամավորի՝ անհայտ պայմաններում անհետանալն արդեն իսկ խոսում է իրավիճակի լրջության մասին։
Աբրահամյանը հարց ուղղեց պաշտպանության նախարարին զինծառայողների անհետացման հանգամանքների մասին։
Սուրեն Պապիկյանն էլ արձանագրեց, թե բոլոր գործերը քննվում են ՔԿ-ում։
