Հակամարտությունների գոտում թուրքական Bayraktar հարվածային անօդաչու թռչող սարքերի մատակարարման վերաբերյալ ԱՄՆ դիրքորոշումը կողմնակալության և հակասեմականության մասին բազմաթիվ հարցեր է առաջացնում, գրում է բլոգեր Իբրահիմ Քարաթաշը հունվարի 22-ին կառավարամետ Daily Sabah թերթում հրապարակված իր հոդվածում:
Նա նշել է, որ Bayraktar անունով թուրքական անօդաչու սարքերը փոխել են պատերազմի ընթացքը Սիրիայում, Լիբիայում և հատկապես Ղարաբաղում։
«Թուրքական անօդաչուները նաև զսպում են Ուկրաինայի Դոնբասում Ռուսաստանի կողմից աջակցվող անջատողական խմբավորումներին։ Ռուսաստանը շատ է նյարդայնանում ուկրաինական բանակի Bayraktar TB2-ի վաճառքի կապակցությամբ, քանի որ շատ լավ հասկանում է, որ նրանք կարող են ոչնչացնել ռուսական ռազմական տեխնիկան և զենիթահրթիռային համալիրները, ինչպիսիք են «Պանցիրը», ինչը, եթե տեղի ունենա, կնշանակի հերթական ռուսական բանակի նվաստացում»,- գրել է նա:
Հեղինակի խոսքով՝ այդ փաստարկները հասկանալի են դարձնում Ռուսաստանի առարկություններն ուկրաինական բանակի հարվածային անօդաչու թռչող սարքերի մատակարարման հարցում։
Սակայն երբ ամերիկացիները բողոքում են թուրքական անօդաչու թռչող սարքերից, Թուրքիայում նրանց դիրքորոշումը կանխակալ են համարում։ Նրա խոսքով՝ ամերիկացի փորձագետները գիտեն, որ միայն Թուրքիան է «պայքարել Ասադի ռեժիմի դեմ, որին աջակցում են Ռուսաստանն ու Իրանը՝ Միացյալ Նահանգների երկու հակառակորդները»:
«Որևէ մեկը կարող է ցույց տալ Սիրիայում, Լիբիայում կամ Ղարաբաղում թուրքական անօդաչուների կողմից սպանված խաղաղ բնակիչների ինչ-որ լուսանկարներ։ Ինչ-որ մեկը կարո՞ղ է ապացուցել, թե անօդաչու սարքերը ըստ նշանակության չեն օգտագործվել»,- գրել է նա:
Ղարաբաղում, ըստ նրա, անօդաչու թռչող սարքերն օգտագործվել են Հայաստանից Ադրբեջանի «օկուպացված» հողերը հետ վերցնելու համար։
Նա կարծում է, որ ԱՄՆ-ի նման դիրքորոշումը երեսպաշտություն է։
Հեղինակը գրում է, որ չնայած քննադատությանը՝ թուրքական կառավարությունը պետք է անի այն, ինչ համարում է բարոյական և մարդասիրական։