Այսօր ՝ հունվարի 28-ին, Հայաստանում նշվում է Բանակի օրը ՝ ՀՀ ԶՈՒ բոլոր զինծառայողների մասնագիտական տոնը ։ 1991թ. նախարարների խորհրդին կից Հայաստանի Հանրապետության կառավարության որոշմամբ ստեղծվեց պաշտպանության պետական կոմիտեն, իսկ ուղիղ 30 տարի առաջ՝ 1992-ի հունվարի 28-ին, Հայաստանի կառավարությունն ընդունեց “Հայաստանի Հանրապետության պաշտպանության մասին” պատմական որոշումը՝ այսպիսով դե յուրե հռչակվեց հայկական բանակի ստեղծումը:
Հունվարի 28-ը դարձավ տոնական և ոչ աշխատանքային 2001 թվականից այն բանից հետո, երբ Հայաստանի երկրորդ նախագահ Ռոբերտ Քոչարյանը հունվարի 6-ին ստորագրեց “Հայաստանի Հանրապետության տոների և հիշատակի օրերի մասին” օրենքը: Հայկական կանոնավոր բանակը ստեղծվել է նորանկախ հանրապետության սահմանները պաշտպանելու համար ձևավորված կամավորական ջոկատների հիման վրա։
1992թ. մայիսին որոշում կայացվեց բանակը համալրել նորակոչիկներով, իսկ մայիսի 28-ին Հանրապետության հրապարակում տեղի ունեցավ զորակոչիկների երդման առաջին հանդիսավոր արարողությունը: Հայաստանի պաշտպանության առաջին նախարար Է դարձել Վազգեն Սարգսյանը. այդ պաշտոնում նա նշանակվել է 1991 թվականի դեկտեմբերի 5-ին։
Հայաստանի ազգային անվտանգության ռազմավարության համաձայն, որը հաստատվել է 2020 թվականին, պաշտպանության ոլորտում դրված նպատակներին հասնելու համար Հայաստանը կշարունակի արդիականացնել երկրի Զինված ուժերը, զարգացնել Զինված ուժերի ղեկավարման և կառավարման համակարգը, ընդլայնել զինված ուժերի հնարավորությունները և բարձրացնել դրանց ինստիտուցիոնալ արդյունավետությունը, երկրի առանցքային ենթակառուցվածքների և կիբերանվտանգության պաշտպանվածության մակարդակը, խթանել ռազմական արդյունաբերության զարգացմանը նպաստող գիտատեխնիկական եւ տեխնոլոգիական առաջընթացը:
