ՀԱՊԿ քարտուղարության՝ որպես ՀԱՊԿ աշխատանքային մարմնի, իրավասությունների շրջանակը չի ներառում կազմակերպության բարձրագույն մարմնի՝ ՀԱՊԿ Հավաքական անվտանգության խորհրդի անդամների հայտարարությունների մեկնաբանումը։ Այս մասին հայտարարել է ՀՀ ԱԳՆ խոսնակ Վահան Հունանյանը՝ անդրադառնալով այն հայտարարությանը, թե ՀԱՊԿ քարտուղարությունը Երևանից պաշտոնական ծանուցում չի ստացել Հայաստանում «Անխորտակելի եղբայրություն-2023» զորավարժությունների չեղարկման մասին:
«ՀԱՊԿ անդամ երկրները Քարտուղարությունից չեն ակնկալում իրենց գործողությունների և որոշումների որևէ ըմբռնում։ Քարտուղարության խնդիրները հստակորեն սահմանված են Կազմակերպության կանոնադրական փաստաթղթերում: Քարտուղարությունը Կազմակերպության մարմինների գործունեության կազմակերպչական, տեղեկատվական, վերլուծական և խորհրդատվական ապահովման աշխատանքային մարմին է: Կոչ ենք անում կազմակերպության նորանշանակ գլխավոր քարտուղարին քարտուղարության մեկնաբանության փաստի վերաբերյալ մանրակրկիտ ուսումնասիրություն անցկացնել՝ դրա կրկնությունը թույլ չտալու նպատակով»,-ասել է ԱԳՆ խոսնակը:
Հիշեցնենք՝ երեկ հայտարարվել է, որ ՀԱՊԿ քարտուղարությունը Հայաստանում «Անխորտակելի եղբայրություն-2023» զորավարժությունների չեղարկման մասին Երևանից պաշտոնական ծանուցում չի ստացել:
Ռուսաստանի պաշտպանության նախարարությունը հունվարի 1-ին հայտարարել էր, որ Հայաստանում կանցկացվի ՀԱՊԿ խաղաղապահ զորամիավորումների «Անխորտակելի եղբայրություն-2023» համատեղ զորավարժությունը։ Սակայն հունվարի 10-ին վարչապետ Նիկոլ Փաշինյանը մամուլի ասուլիսում հայտարարել էր, որ Հայաստանը նպատակահարմար չի գտնում 2023 թվականին ՀԱՊԿ զորավարժություններ անցկացնել հանրապետությունում։
