«Forbes» ամսագիրը հրապարակել է «Ռուսաստանի անշարժ գույքի արքաների» ցուցակը՝ վարձակալության ամենաբարձր եկամուտ ստացող ընկերությունների մեջ։
Ըստ Forbes-ի՝ առաջին տեղը զբաղեցրել է Գոդ Նիսանովի և Զարահ Իլիեվի «Կիևսկայա պլոշադ»-ը։ Հրապարակման համաձայն՝ 2020 թվականին ընկերությունն ավելի քան 1,2 միլիարդ դոլար վարձույթ է վաստակել: Ամենամեծ օբյեկտներից են «Ֆուդ Սիթի» մեծածախ և մանրածախ սննդի կենտրոնը և «Էվրոպեյսկի» առևտրի և զվարճանքի համալիրը:
Երկրորդ տեղը զբաղեցնում է Սամվել Կարապետյանի «Տաշիր» խումբը՝ 585 միլիոն դոլար վարձակալության եկամտով: Ընկերության հիմնական օբյեկտներն են Դմիտրովսկոյե մայրուղու «Ռիո» առևտրի կենտրոնը, Կվարտալ Ուեսթ բազմաֆունկցիոնալ համալիրը և «Նովոտել Մոսկվա Սիթի» հյուրանոցը:
Առաջատարների եռյակը փակում է Միխայիլ և Սաիտ-Սալամ Գուցերիևների «Սաֆմար»-ը: Խմբի եկամուտը կազմում է 460 միլիոն դոլար: «Սաֆմարին» են պատկանում Moscow Mariott Grand և National հյուրանոցները, Kaleidoscope առեւտրի կենտրոնը, ինչպես նաև պահեստի գրեթե մեկուկես միլիոն քառակուսի մետր տարածքը:
Forbes-ը նշում է, որ նկատի է առնված միայն ընկերությունների վարձակալության եկամուտը: Հաշվի չեն առնվել այն տարածքները, որոնք օգտատերերը օգտագործում են իրենց սեփական կարիքների համար: