Տնտեսական հարցերի մշտական հանձնաժողովի նիստում քննարկվում է «Հրապարակային սակարկությունների մասին» ՀՀ օրենքում փոփոխություններ և լրացումներ կատարելու մասին հարցը։ Նախագծի հեղինակներն են Արտակ Մանուկյանն ու Հայկ Գևորգյանը, հիմնական զեկուցողը՝ Արտակ Մանուկյանը։
Օրենքի նախագծի ընդունման անհրաժեշտությունը պայմանավորված է շուկայական տնտեսության և տեղեկատվական տեխնոլոգիաների զարգացման արդի ժամանակահատվածում գործարար շրջանառության կազմակերպման գործընթացների առավել արդյունավետ և ժամանակակից եղանակների ստեղծման անհրաժեշտությամբ:
Նախագծի ընդունման պայմաններում ակնկալվում է ոլորտի տնտեսվարող սուբյեկտների ու շահառուների համար մրցակցային պայմանների ապահովում, բիզնեսի ծախսերի նվազեցում, ինչպես նաեւ էլեկտրոնային հասարակության ձեւավորման համար գործիքակազմերի խթանում:
«Հրապարակային սակարկությունների մասին» ՀՀ օրենքի նախագծի ընդունման կապակցությամբ պետական կամ տեղական ինքնակառավարման մարմնի բյուջեում ծախսերի ավելացում չի նախատեսվում, միաժամանակ հնարավոր է եկամուտների ավելացում, վարչական ռեսուրսների կրճատում:
Տնտեսվարող սուբյեկտների և շահառուների համար բարենպաստ պայմանների ստեղծում՝ գործարքային ծախսերի կրճատման և էլեկտրոնային հարթակների զարգացման տեսանկյունից:
Նախագծին առաջին ընթերցմամբ հավանություն տալու հարցն ընդունվեց։
