ՀՀ-ում ՌԴ դեսպանատունը մեկնաբանել է հայ ռազմագերիների վերադարձի հարցը լուծելու պահանջով այսօր դեսպանատան առջև տեղի ունեցած հերթական ցույցը:
«Մենք լիովին հասկանում և կիսում ենք այն ընտանիքների վիշտը և անհանգստությունը, որոնց հարազատներն ու մտերիմները դեռ տուն չեն վերադարձել: Մենք գիտակցում ենք առկա իրավիճակի ամբողջ սրությունն ու զգայունությունը: Այն իսկապես մարդկային մեծ ողբերգություն է»,- ասվում է հայտարարության մեջ:
Դեսպանատունն ընդգծել է, որ Հայաստանի և Ադրբեջանի ռազմագերիների փոխանակման հարցը գտնվում է Ռուսաստանի Դաշնության ղեկավարության ուշադրության կենտրոնում՝ հիշեցնելով, որ ռուսական կողմի միջնորդական ջանքերի տեսանելի արդյունքը փետրվարի 9-ին ևս 5 մարդու վերադարձն է Հայաստան:
«Այս առումով զարմանալի է, թե ինչու հենց այս իրադարձությունից հետո, որն արտացոլում է Ռուսաստանի ղեկավարության և խաղաղապահ զորախմբի ջանքերը, և դրանց արդյունքը, նմանատիպ հավաք է անցկացվում դեսպանատան առջև: Ակամա հարց է ծագում. որո՞նք են դիվանագիտական առաքելության առջև նմանատիպ գործողությունների կազմակերպիչների իրական նպատակները»,- նշվում է դեսպանատան մեկնաբանության մեջ:
