Հայոց բանակի կազմավորման 30-րդ տարեդարձի կապակցությամբ խորհրդարանական ընդդիմությունը «Եռաբլուր» այցելելու փոխարեն մարտական դիրքեր է այցելել։
Հայոց բանակի օրվա առթիվ «Հայաստան» խմբակցության պատգամավորները երեկ և այսօր այցելել են առաջնագծի տարբեր հատվածներ՝ ծանոթացել ծառայության պայմաններին, առկա իրավիճակին։
Խմբակցության տարածած հաղորդագրության համաձայն՝ պատգամավորները եղել են Սյունիքի, Գեղարքունիքի, Տավուշի և Արարատի զորամասերում և դիրքերում։ Մի խումբն էլ այցելել է Արցախ։
ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանն էլ Facebook-ի էջում հայտնել է, որ պատգամավոր Տիգրան Աբրահամյանի հետ գնում են դիրքեր անվտանգային խնդիրները ուսումնասիրելու համար:
«Բանակի տոնը պետք է նշել զինվորի կողքին: Տիգրան Աբրահամյանի հետ կլինենք մի շարք դիրքերում՝ անվտանգային խնդիրները ուսումնասիրելու, սպային և զինվորին նեցուկ լինելու համար»,- գրել է պատգամավորը։
