Սովորաբար մենք ՊՆ-ին թիրախ չենք դարձրել, քանի որ դա Պաշտպանության նախարարություն է, սակայն Սուրեն Պապիկյանը պետք է հասկանա, որ ինքը ՔՊ-ի պաշտպանը չի ու զբաղվի ոչ թե նրա պաշտպանությամբ, այլ ՀՀ սահմանների։ Այս մասին լրագրողների հետ հանդիպման ժամանակ ասաց ԱԺ պատգամավոր, «Դիմադրության» շարժման առաջնորդ Իշխան Սաղաթելյանը՝ պատասխանելով Պապիկյանի՝ եռամսյա հավաքների մասին հայտարարությանը։
«Նա պետք է առհասարակ կողմնորոշվի՝ զբաղվում է ՔՊ տարածքային գրասենյակների ստեղծմամբ, թե մեր երկրի պաշտպանությամբ։ Եվ առհասարակ պետք է ձենը կտրի ու զբաղվի նրանով, ինչով պետք է զբաղվել․ Հայաստանի սահմանների պաշտպանությամբ։ Այլ ոչ թե ընդդիմությանը «հաթաթա տա», հոխորտա կամ մատ թափ տա»,- ասաց Սաղաթելյանը։
Սաղաթելյանը կարծում է, որ Պապիկյանը պետք է զբաղվի նաև բանակի վերակառուցմամբ, որն ամբողջությամբ ձախողել է նա իր թիմի հետ։