ՀՀ-ում ԱՄՆ դեսպանությունը ներկայացրել է դեսպան Թրեյսիի հրաժեշտի տեսանյութը, որտեղ Լին Թրեյսին խոսում է Հայաստանում անցկացրած հիշարժան պահերի և հայ-ամերիկյան ամուր հարաբերությունների մասին` հույս հայտնելով, որ ի հեճուկս ներկայիս մարտահրավերների՝ հնարավոր կլինի ապահովել խաղաղություն։
Ավելի քան 3 տարի առաջ Հայաստան ժամանելիս դեսպան Թրեյսիին դիմավորեց «ՖԼԷՔՍ» կրթական ծրագրի շրջանավարտ Եվա Գասպարյանը։ Այժմ Եվան օդանավակայանում է՝ հրաժեշտ տալու նրան։ Դեսպան Թրեյսին հեռանում է Հայաստանի ապագայի վերաբերյալ լավատեսորեն տրամադրված, ինչի հիմքում հայ մարդու և հատկապես՝ հայ երիտասարդների ուժն ու կամքն է:
«Արդեն երեք տարուց ավելի է՝ Հայաստանում եմ։ Երկրի համար դժվարին ժամանակներ էին։ Չնայած անհերքելի մարտահրավերներին՝ ես լավատես եմ Հայաստանի ապագայի հանդեպ։ Լավատեսության հիմքում ժողովուրդն է։ Ինձ ոգեշնչում է հայ-ամերիկյան հարաբերությունների դրական ուղղվածությունը»,- ասում է Թրեյսին։
Նա շեշտում է, որ խոսնակ Նենսի Փելոսիի վերջին այցն ընդգծեց հայ-ամերիկյան գործընկերության դրական հետագիծն ու ԱՄՆ աջակցությունը Հայաստանին։
«2021 թվականին նախագահ Բայդենի կողմից Հայոց ցեղասպանության ճանաչումը ևս մեկ կարևոր իրադարձություն էր։ Միացյալ Նահանգները հանձնառու է Հայաստանի ինքնիշխանության հարցում, և մենք կշարունակենք աշխատել Հարավային Կովկասի տարածաշրջանում խաղաղության հաստատման ուղղությամբ»,- ասում է դեսպանը։
Նրա խոսքով՝ Հայաստանը գեղեցիկ երկիր է՝ հարուստ մշակութային ժառանգությամբ՝ Սուրբ Հովհաննես եկեղեցուց մինչև Սանահինի վանք։
«Հպարտ եմ, որ կարողացել ենք նպաստել Հայաստանի եզակի ժառանգության պահպանությանը։ Ետ նայելով իմ պաշտոնավարման 3 տարիներին և անկախությունից ի վեր Հայաստանի զարգացմանը՝ չեմ կարող չոգեշնչվել հայ ժողովրդի աննկուն տեսակով ր չլցվել ապագայի հանդեպ մեծ հույսով։ Այստեղից տանում եմ հիշողություններ, որոնք ընդմիշտ կապրեն իմ հոգում»,- ասված է ուղերձում։
Armenia Today-ն ավելի վաղ հայտնել էր, որ ԱՄՆ Սենատը հաստատել է Քրիստինա Քվինին ն Հայաստանում դեսպանի պաշտոնում։
