ՌԴ նախագահ Վլադիմիր Պուտինն ինտեգրացիոն միավորումների միջոցառումներից ՀՀ վարչապետ Նիկոլ Փաշինյանի բացակայությունը կապել է Հայաստանի ներքաղաքական գործընթացների հետ։
«Ինչ վերաբերում է ընդհանուր միջոցառումներից Հայաստանի վարչապետի բացակայությանը, ապա մենք գիտենք, որ դա կապված է Հայաստանում տեղի ունեցող որոշ գործընթացների հետ և կապված չէ այդ ինտեգրացիոն ասոցիացիաներում աշխատանքը շարունակելու կամ չշարունակելու ցանկության հետ»,–տարվա արդյունքների մասին մամուլի ասուլիսում հայտարարել է նա։ Պուտինը հավելել է, որ ԱՊՀ-ում, ԵԱՏՄ-ում և ՀԱՊԿ-ում անդամակցության դադարեցումը չի բխում Երևանի շահերից։
Մեկնաբանելով Լեռնային Ղարաբաղի շուրջ հայ-ադրբեջանական հակամարտությանը՝ ՌԴ նախագահը նշել է, որ Մոսկվան տեղյակ չէր Ղարաբաղն Ադրբեջանի կազմում ճանաչելու Երևանի որոշման մասին։ «Մենք չէինք, որ լքեցինք Ղարաբաղը, Հայաստանն էր, որ ճանաչեց Ղարաբաղն Ադրբեջանի մաս։ Նրանք դա իրականում արել են սեփական նախաձեռնությամբ, իսկ մեզ առանձնապես չեն տեղեկացրել, որ պատրաստվում են նման որոշում կայացնել»,- ասել է նա։
Նոյեմբերի 14-ին Փաշինյանը հրաժարվել էր մասնակցել նոյեմբերի 23-ին Մինսկում կայանալիք ՀԱՊԿ գագաթնաժողովին։ ՀԱՊԿ արտաքին գործերի և պաշտպանության նախարարների խորհուրդների Մինսկում կայացած հանդիպումներին մասնակցությունից հրաժարվել էին նաև Հայաստանի արտաքին գործերի և պաշտպանության նախարարության նախարարներ Արարատ Միրզոյանն ու Սուրեն Պապիկյանը։ Նոյեմբերի 23-ին ՌԴ նախագահի օգնական Յուրի Ուշակովը հույս էր հայտնել, որ Փաշինյանը կմասնակցի տարեվերջին Սանկտ Պետերբուրգում կայանալիք ԵԱՏՄ և ԱՊՀ գագաթնաժողովներին։ Նոյեմբերի 29-ին ՌԴ ԱԳՆ ներկայացուցիչ Մարիա Զախարովան մեկնաբանել էր Փաշինյանի հնարավոր մասնակցությունը ԵԱՏՄ գագաթնաժողովին և կոչ էր արել կոնկրետ քայլեր ձեռնարկել։
