Բանակցությունները դրական ուղղությամբ են ընթանում և մինչև երեկո ամբողջ խնդիրը հարթված կլինի և Գորիս-Կապան ճանապարհը կբացվի։
Այս մասին ԱԺ-ում լրագրողների հետ ճեպազրույցում ասաց «Քաղաքացիական պայմանագիր» կուսակցության պատգամավոր Նարեկ Ղահրամանյանը:
«Երեկ ադրբեջանցիները փակել են ճանապարհի մի հատված «վիճելի տարածքներում», որոնք, ըստ խորհրդային քարտեզների, իրենցն է: Այս ուղղություններով նրանք փակել են ճանապարհը»,- նշեց պատգամավորը։
Ի դեպ, ադրբեջանցիները նշում են, որ իբր հայ զինծառայողները վիրավորել են իրենց զինծառայողին:
ԱԺ-ում կառավարության ծրագիրը ներկայացնելու ժամանակ ՀՀ վարչապետ Նիկոլ Փաշինյանը հայտարարեց, որ դանակահարության վերաբերյալ տեղեկությունը իրականությանը չի համապատասխանում։
Նա նշեց՝ այն հատվածը, որը ԽՍՀՄ քարտեզներով Խորհրդային Հայաստանից դուրս է եղել, ադրբեջանցիները եկել, փակել են։
Նիկոլ Փաշինյանը վստահեցրել է, որ Սյունիքի մարզը Հայաստանից կտրված չէ, կա այլ՝ գրունտային ճանապարհ․ ասֆալտապատում են Կապան-Աղվանի այլընտրանքային ճանապարհը։
Հիշեցնենք նաև, որ ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը։