Համացանցի հայկական տիրույթում շրջանառվող լուրերը, թե իբր Քաշաթաղի շրջանի Աղավնո համայնքում կազմակերպված գողություններ են կատարվում, իրականությանը չեն համապատասխանում։ Այս մասին Armenia Today-ի հետ զրույցում հայտնեց Արցախի Հանրապետության ներքին գործերի նախարարության լրատվության և հանրության հետ կապերի բաժնի պետ Հունան Թադևոսյանը:
«Երեկ երեկոյան, երբ համացանցում տարածվեց Աղավնայում գողության մասին տեղեկությունները, արագ կապվեցինք Քաշաթաղի ոստիկանության հետ։ Ոստիկանության ներկայացուցիչն այդ պահին Աղավնոյում էր և հայտնեց, որ գողության դեպք չի արձանագրվել»,- փաստեց Թադևոսյանը։
Համացանցում Աղավնոյում տեղի ունեցող գողության վերաբերյալ շրջանառվող տեղեկությունները ճշտելու համար Armenia Today-ը կապ հաստատեց նաև գյուղապետ Անդրանիկ Չաուշյանի հետ։ Վերջինս հրաժարվեց այս հարցին պատասխանել, ըստ էության, ո՛չ հերքելով, ո՛չ հաստատելով տարածվող լուրերը։
Նշենք, որ երեկվանից Ֆեյսբուքի մի շարք օգտատերեր տեղեկություններ են տարածում, թե Աղավնոյում կազմակերպված թալան է սկսվել։
Հիշեցնենք, որ Արցախի տարածքային կառավարման և ենթակառուցվածքների նախարար Հայկ Խանումյանը հանդիպել է Քաշաթաղի շրջանի բնակիչների հետ և զգուշացրել, որ Բերձորի, Աղավնոյի, Սուսի բնակիչներն ստիպված են մինչև օգոստոսի 25-ը լքել իրեն տները։