Շուռնուխում իրենց տները կորցրած բնակիչները ժամանակավոր կացարաններում են տեղավորվել: Այս մասին հայտնել են Սյունիքի անվտանգային հարցերով զբաղվող աշխատանքային խմբի 3-րդ նիստի ժամանակ:
Քաղաքաշինության կոմիտեի նախագահի տեղակալ Նունե Պետրոսյանն ասում է, որ նոր բնակարանների կառուցման համար հիմք են հանդիսացել կորցրած տներում գրանցված մարդկանց քանակն ու անվտանգային համակարգը:
Մի շարք ծրագրեր են իրականացվում Սյունիքում. Էկոնոմիկայի նախարարությունն առաջարկել է 6 ամսով հետաձգել վարկ ունեցող ֆերմերների արտոնությունների ժամկետը:
Շուռնուխն ու Սյունիքի ևս 6 համայնքի արոտավայրեր կապահովվեն ջրով մինչև հունիս ամիս: Մեղուների ձեռքբերման, չորանոցների կառուցման համար 270 միլիոն դրամ կհատկացվի Սյունիքի 10 համայնքի, իսկ 3 համայնքի նոր տրակտոր կտրամադրվի:
Ինչպես վարչապետի խորհրդական Ռոբերտ Ղուկասյանն է ասում, Սյունիքում նաև նոր ճանապարհ կկառուցվի: Դա կիրագործվի եղանակի տաքանալուն պես:
ՊՆ փոխնախարար Արման Սարգսյանն էլ փաստում է, որ Սյունիքի ճանապարհներն անվտանգ են՝ չնայած մամուլում շրջանառվող լուրերին: Ըստ նրա՝ պարզապես Հայաստանի քաղաքացու համար անսովոր է տեսնել հակառակորդ պետության զինվորականների ներկայությունը այստեղ- այնտեղ, սակայն իրավիճակը լիովին վերահսկելի է: