Գեղարքունիքի մարզի Գավառ համայնքի Սարուխան գյուղում ձեռամբ Հայ Առաքելական եկեղեցու Ուկրաինայի թեմի առաջնորդ Մարկոս եպիսկոպոս Հովհաննիսյանի և աղոթակցությամբ Գեղարքունյաց թեմի առաջնորդական տեղապահ Տեր Պարթև վարդապետ Բարսեղյանի և թեմի հոգևոր դասի, օծվել և բացվել է նորակառույց Սուրբ Աստվածածին եկեղեցին։ Այս մասին տեղեկացնում է Գեղարքունիքի մարզպետ Կարեն Սարգսյանը։
Մի շարք պաշտոնյաներ սարուխանցիների հետ միասին մասնակցել են հանդիսավոր արարողությանը։ Օծման արարողությունից հետո Գեղարքունյաց թեմի Սարուխանի հոգևոր հովիվ Տեր Ներսես քահանա Սահակյանն ընթերցել է Ամենայն Հայոց Հայրապետ Ն․Ս․Օ․ Տ․Տ․Գարեգին Երկրորդի կոնդակը, որով Վեհափառ Տերն իր շնորհավորական ուղերձն է հղել Հայ առաքելական եկեղեցու Գեղարքունյաց թեմին, մարզային իշխանություններին ու ժողովրդին և «Գրիգոր Լուսավորիչ» բարձրագույն շքանշանի է արժանացրել եկեղեցու կառուցման հովանավոր և բարերար Արայիկ Ավետիսյանի ընտանիքին։
Սարուխանի Սուրբ Աստվածածին եկեղեցու կառուցումը հովանավորելու համար Գեղարքունիքի մարզպետի շնորհակալագրով է պարգևատրեցի Արայիկ Ավետիսյանի ընտանիքը։
Սարուխանի Սուրբ Աստվածածին եկեղեցու հիմնարկեքի արարողությունը տեղի է ունեցել 2007 թվականին՝ Գեղարքունյաց թեմի այն ժամանակվա առաջնորդ Մարկոս եպիսկոպոս Հովհաննիսյանի ձեռամբ։ Եկեղեցու ճարտարապետն է արդեն երջանկահիշատակ Ստեփան Նալբանդյանը, քանդակագործը՝ Գևորգ Մնացականյանը։ Եկեղեցու շինարար Անդրանիկ Չիչոյանի ներկայացմամբ՝ Սարուխանի Սուրբ Աստվածածին եկեղեցին կենտրոնագմբեթ և քառանավ տուֆակերտ շինություն է՝ 28 մետր բարձրությամբ և 212,5 քառակուսի մետր մակերեսով, արտաքին շքեղ քանդակներով։
