Մոսկվայում տեղի կունենան մեծանուն կոմպոզիտոր Առնո Բաբաջանյանի 100-ամյակին նվիրված միջոցառումներ:
Հոբելյանական միջոցառումներին մասնակցելու նպատակով սեպտեմբերի 13-15-ը Ռուսաստանի մայրաքաղաք է գործուղվելու Հայաստանի պատվիրակությունը՝ ՀՀ կրթության, գիտության, մշակույթի և սպորտի նախարարի տեղակալ Արա Խզմալյանի գլխավորությամբ, հայտնում է գերատեսչության մամուլի ծառայությունը:
Սեպտեմբերի 11-ին Մոսկվայի պետական կոնսերվատորիայի Ռախմանինովի դահլիճում տեղի կունենա համերգ, որտեղ կհնչեն Առնո Բաբաջանյանի դասական ստեղծագործությունները, իսկ սեպտեմբերի 14-ին Ռուսաստանում ՀՀ դեսպանատանը տեղի կունենա Առնո Բաբաջանյանի, Ալեքսանդր Հարությունյանի և Էդվարդ Միրզոյանի հոբելյաններին նվիրված համերգ:
Հիշեցնենք, որ ՀՀ կրթության, գիտության, մշակույթի և սպորտի նախարարության աջակցությամբ հունվարի 22-ից մեկնարկել են հայ մեծանուն կոմպոզիտոր, դաշնակահար, ԽՍՀՄ ժողովրդական արտիստ, պետական մրցանակների դափնեկիր Առնո Բաբաջանյանի 100-ամյակին նվիրված հոբելյանական միջոցառումները: