Խաղողագործների հետ կապված բոլոր խնդիրներին տեղյակ ենք, և ամենօրյա ռեժիմով զբաղվում ենք այդ հարցով: Այս մասին Կառավարության նիստից հետո լրագրողների հետ զրույցում վստահեցրեց էկոնոմիկայի նախարար Վահան Քերոբյանը։
Նա հայտնեց, որ խաղողի մթերման գործընթացի կազմակերպմանը ներգրավված է ինքը, իր տեղակալն ու փոխվարչապետ Սուրեն Պապիկյանը։
Էկոնոմիկայի նախարարը հավաստիացրեց, որ փորձում են այնպես անել՝ գյուղացու բերքը գետնին չմնա։
Քերոբյանը բացատրեց, թե որն է այս տարվա խաղողի մթերման գնի նվազեցման պատճառը։
«Անցած տարի շատ քիչ է սպառվել կոնյակ, և ընկերությունները ցածր սպառման պայմաններում, միևնույն է, բավականին շատ մթերել են: Բնականաբար, պետք է պաշարները և վաճառքները բալանսավորվեն, որպեսզի նորից ընկնենք նորմալ աշխատանքային գործընթացի մեջ»,- ընդգծեց նա։
Հիշեցնենք՝ ԱԺ-Կառավարություն հարցուպատասխանի ժամանակ ՀՀ փոխվարչապետ Սուրեն Պապիկյանը հայտարարեց, որ խոշոր մթերող ընկերությունների հետ խաղողի մթերման գնի շուրջ հայտարարի են եկել։
Պայմանավորվածություն են ձեռք բերել, որ տեխնիկական սորտի խաղողը կիլոգրամը 115 դրամի փոխարեն մթերվի 130-ով։
Հիշեցնենք նաև, որ հանրապետության տարբեր համայնքների խաղողագործները պարբերաբար ճանապարհ են փակել՝ բողոքելով խաղողի մթերման գներից։ Այս տարի վերամշակող ընկերությունները նվազեցրել են խաղողի մթերման գինը և մեկ կիլոգրամ խաղողի դիմաց առաջարկում են 100-110 դրամ, ինչը, ըստ գյուղացիների, չնչին գին է։