Երկուշաբթի՝ սեպտեմբերի 20-ին, Հայ ձեռներեցների ասոցիացիայի նախաձեռնությամբ և «Տաշիր» ընկերությունների խմբի աջակցությամբ Երևանում կանցկացվի երկրի հիմնական գործարար համաժողովը՝ «Armenian Business Forum–2021»-ը: Ինչպես ավելի վաղ հայտնել էր Armenia Today-ը՝ հղում անելով կազմակերպիչներին, Ռուսաստանի Դաշնությունը դարձել է ֆորումի գործընկեր երկիրը:
Հայտնի է դարձել ֆորումի շրջանակներում իրականացվող միջոցառումների օրակարգը: Սեպտեմբերի 20-ի առավոտյան տեղի կունենա «Ռուս-հայկական տնտեսական համագործակցություն. խոստումնալից նախագծեր» խորագրով կլոր սեղան, որը կներառի Հայաստանի և Ռուսաստանի փոխվարչապետներ Մհեր Գրիգորյանի և Ալեքսեյ Օվերչուկի, Հայաստանում Ռուսաստանի դեսպան Սերգեյ Կոպիրկինի, ՀՀ էկոնոմիկայի նախար Վահան Քերոբյանի, Ռուսաստանի տնտեսական զարգացման փոխնախարար Դմիտրի Վոլվաչի, Հայաստանի բարձր տեխնոլոգիական արդյունաբերության նախարար Վահագն Խաչատուրյանի, Երևանի քաղաքապետ Հայկ Մարությանի, ինչպես նաև քաղաքական գործիչների և գործարարների ելույթները: Armenia Today-ի տեղեկություններով՝ ակնկալվում է, որ կստորագրվի հայ-ռուսական համաձայնագիր ներդրումային համագործակցության վերաբերյալ:
Կլոր սեղանից հետո տեղի կունենան փորձագիտական քննարկումներ այնպիսի արդիական թեմաների շուրջ, ինչպիսիք են քաղաքային տնտեսությունը, էներգետիկան, շրջակա միջավայրը և նորարարությունը, որոնցում ելույթ կունենան այս ոլորտների փորձագետներն ու բիզնեսի ներկայացուցիչները: Կլինեն նախագծերի շնորհանդեսներ Երևանում, Գյումրիում ու Դիլիջանում:
Երեկոյան Dvin Music Hall-ում տեղի կունենա «Armenian Business Forum–2021»-ի բացումը, որին կմասնակցեն ՀՀ վարչապետ Նիկոլ Փաշինյանը, Հայաստանի և Ռուսաստանի փոխվարչապետներ Մհեր Գրիգորյանը և Ալեքսեյ Օվերչուկը, «Տաշիր» խմբի նախագահ Սամվել Կարապետյանը, Comedy Club Production-ի հիմնադիր և գլխավոր պրոդյուսեր, «Գազպրոմ-Մեդիա Հոլդինգ» ԲԲԸ ժամանցային հեռուստաալիքների ղեկավար Արթուր Ջանիբեկյանը, Ռուսաստանի զարգացման պետական կորպորացիայի փոխնախագահ Դանիել Ալգուլյանը և շատ ուրիշներ:
Ինչպես նշվել էր ավելի վաղ՝ «Armenian Business Forum–2021»-ի նպատակն է խթանել տնտեսական ներուժը և ներդրումային հնարավորությունների զարգացումը Հայաստանում, ստեղծել տարբեր գործարար համայնքների միջև բաց երկխոսության հարթակ և ամրապնդել երկրում նորարարական ձեռնարկատիրության ոգին: Ֆորումին կներկայացվեն նաև սեպտեմբերի 10-17-ը Դիլիջանում կայացած Buissup Global ֆորումի ուսումնական և քննարկման հարթակի արդյունքների հիման վրա ընտրված 10 լավագույն սկսնակ նախագծերը:
Ինչպես ավելի վաղ հայտնել էր Armenia Today-ը, Հայ ձեռներեցների ասոցիացիան կազմակերպել էր լավագույն երիտասարդական սկսնակ նախագծերի մրցունակ ընտրություն, որոնց հեղինակները հնարավորություն ունեցան Buissup Global Forum-ի և փորձագետների կողմից վերջնական տեսքի բերել իրենց նախագծերը և դրանք ներկայացնել պոտենցիալ ներդրողներին։ Հայկական բիզնես ֆորումը կազմակերպում է Ռուսաստանի հայ ձեռնարկատերերի ասոցիացիան, որի հիմնադիրն ու նախագահը բարերար և ձեռնարկատեր, «Տաշիր» ընկերությունների խմբի ղեկավար Սամվել Կարապետյանն է:
Ըստ կազմակերպիչների` Ասոցիացիայի նպատակներից մեկն է ստեղծել յուրահատուկ հարթակ ինչպես երիտասարդ, այնպես էլ կայացած ձեռներեցների համար, աջակցել հայ երիտասարդ ձեռներեցներին սեփական բիզնես գաղափարների զարգացման և դրանց իրագործման գործում: Ավելի վաղ «Տաշիր» ընկերությունների խմբի ներդրումային ծրագրերի իրականացման թեման քննարկվել էր Հայաստանի վարչապետ Նիկոլ Փաշինյանի և «Տաշիր խմբի» նախագահ Սամվել Կարապետյանի հանդիպմանը:
