Կառավարությունն ունի գործարարների կարիքը իր ծրագրերն իրականացնելու համար։ Այս մասին իր ելույթում ասաց վարչապետ Նիկոլ Փաշինյանը «Armenian Business Forum 2021»-ում։
«ՀՀ ապագան կառուցելու համար կառավարությունը մեկնարկում է ծրագրերի շարքը, որտեղ կարևորում է կրթության բարեփոխումները»։
Ոլորտի զարգացման համար Փաշինյանը նշեց 300 դպրոցի, 500 նախակրթարանի կամ մանկապարտեզի կառուցման ու հիմնանորոգման անհրաժեշտությունը։
Առաջիկա 5 տարիներին կսկվի կամ կավարտվի 15 ջրամբարի կառուցում, տարեկան 500 կմ ճանապարհ կբարեկարգվի։
Փաշինյանն ասաց, որ պատրաստվում են մեկնարկել «Հյուսիս-Հարավ» ճանապարհի Սիսիան-Ագարակ հատվածը, որի համար միլիարդների ներդրում է արվում։ Նա նշեց, որ հայ գործարարների աջակցության կարիքը կա։ Քանի որ հաշվարկները ցույց են տալիս, որ ՀՀ-ում չկան այնպիսի հզորություններ, որոնք կկարողանան իրականացնել կառավարության կողմից առաջ քաշվող հավակնոտ ծրագիրը։
Նա ավելացրեց, որ ՀՀ-ում կապիտալ ծախսերի թերակատարման խնդիր կա․ չի կատարվում լիարժեք իրականացում պետության առաջարկած ծրագրերին։ Նա նաև ողջունեց բիզնես ֆորումում առկա տրամադրությունը, նշեց, որ պետությունն ունի սփյուռքի, միջազգային գործընկերների և դաշնակիցների աջակցության կարիքը։
