Մեր տնտեսությունը նախորդ տարվա պես շարունակում է անկում ապրել և դեռևս չվերականգնված մնալ։
Այս մասին Armenia Today-ի հետ զրույցում նշեց ԱԺ «Հայաստան» խմբակցության պատգամավոր Թադևոս Ավետիսյանն՝ ամփոփելով տնտեսական տարին։
Նա նկատեց, որ տնտեսության մեջ շարունակում են պահպանվել մտահոգիչ գոծոնները՝ ներդրումների ցածր մակարդակ, չաճող եկամուտներ և բարձր գնաճ։
«Տնտեսական տարին ծախողված է։ Եթե 2020 թվականին տնտեսական անկումը փաթեթավորեցին կորոնավիրուսով և Արցախյան 44-օրյա պատերազմով, ապա 2021-ին նույնիսկ նախորդ տարվա 7,4 տոկոս անկումը չի վերականգնվել։ Խոստացված միլիարդավոր դոլարների ներդրումներն այդպես էլ մնացին ականջահաճո հայտարարություններ, երկնիշ տնտեսական աճն էլ իրականություն չդարձավ»,- մատնանշեց պատգամավորը։
Թադևոս Ավետիսյանի գնահատմամբ՝ 2022 թվականի պետական բյուջեն հակասոցիալական է։
«Նախատեսվում է պետական բյուջեի ընդհանուր եկամուտների աճ՝ 29 տոկոսով, ծախսերի աճ՝ 18,2 տոկոսով։ Միևնույն ժամանակ, նախատեսված չէ անապահովության նպաստների չափերի բարձրացում, իսկ կենսաթոշակի որոշ տեսակների չափերն ավելանալու են միջինը 7-8 տոկոսով։ Եվ սա այն դեպքում, երբ ըստ այդ նախագծի՝ կառավարությունը միայն 2021 թվականին կանխատեսում է 7 տոկոսով սպառողական ապրանքների գների աճ, իսկ 2022 թվականին՝ մինչև 5,5 տոկոս»,- եզրափակեց «Հայաստան» խմբակցության ներկայացուցիչը։