Իրանը կարող է օգտագործել Հայաստանի հնարավորությունները ԵԱՏՄ 200 միլիոնանոց շուկա դուրս գալու համար։ Ինչպես տեղեկացնում է hamshahrionline.ir կայքը, այս մասին հայտարարել է Իրան-Հայաստան բարեկամության ասոցիացիայի տնօրենների խորհրդի անդամ, Թավրիզի առևտրական պալատում Հայաստանի պատասխանատու Ալիռեզա Նազիֆը։
Նա նշել է, որ վերջերս Իրանի արդյունաբերության, հանքերի և առևտրի նախարար Սեյեդ Ռեզա Ֆաթեմիյամինի՝ Երևան կատարած այցի ընթացքում դրական պայմանավորվածություններ են ձեռք բերվել: Մասնավորապես, հայկական կողմը խոստացել է քննարկել իրանական բեռնատարների մուտքի վճարը Հայաստանում իջեցնելու հարցը։ «Ներկայումս իրանական բեռնատարների համար բեռների տարանցման արժեքը մոտ 300-400 դոլար է, և մենք հուսով ենք, որ այդ համաձայնագրի շրջանակներում գները զգալիորեն կնվազեն»,- ասել է Նազիֆը:
Նա հավելել է, որ Հայաստանի տարածքով անցնում է «Հյուսիս-Հարավ» միջանցքի հիմնական երթուղիներից մեկը, և Իրանի նոր կառավարությունը շեշտը դնում է իր հարևանի հետ հարաբերությունների ընդլայնման վրա:
«Այս առումով մենք հույս ունենք, որ հաջորդ տարի մեր արտահանումը դեպի Հայաստան կավելանա և ներկայիս 300-400 միլիոն դոլարից կհասնի մինչև 1 միլիարդ դոլար: Չնայած կորոնավիրուսի և Արցախյան 44-օրյա պատերազմի հետևանքով առաջացած բոլոր խնդիրներին՝ Իրանի և Հայաստանի առևտրի ծավալը չի կրճատվել։ Մենք հուսով ենք, որ այն կավելանա»,- նշել է Նազիֆը:
Նա նաև հիշեցրել է, որ իրանական ընկերությունները կմասնակցեն «Հյուսիս-Հարավ» ճանապարհի կառուցման մրցույթներին, որը սկիզբ է առնում Իրանի սահմանից մինչև Վրաստանի տարածք:
«Այդ երթուղով նախատեսվում է կառուցել մի քանի թունել, որոնց կառուցման մրցույթներին կմասնակցեն նաև իրանական ընկերությունները»,-հավաստիացրել է պաշտոնյան՝ հավելելով, որ Իրանը տեխնիկական և ինժեներական ծառայությունների արտահանման լավ հնարավորություններ ունի, իսկ Հայաստանն այժմ շեշտը դնում է ենթակառուցվածքների զարգացման վրա:
Առաջիկա 1-2 ամիսներին տեղի կունենա հայ-իրանական միջկառավարական հանձնաժողովի նիստը, որի ընթացքում կքննարկվեն այդ բոլոր հարցերը։ Նա նշել է, որ Հայաստանը բացառիկ հնարավորություն է Իրանի համար։ Նրա խոսքով, հայկական շուկան փոքր է, բայց եզակի աշխարհագրական դիրքից պետք է օգտվել: Ալիռեզա Նազիֆը նաև հայտնել Է իրանական կողմի մտադրությունների մասին, որոնց թվում նաև դեպի հայկական շուկա ավտոմեքենաների արտահանման ծավալները մեծացնելն է։
