Զբոսաշրջության ոլորտում թեև ակնհայտորեն աճ կա, բայց դժվար կլինի ասել՝ նախաքովիդյան ցուցանիշին վերադարձել ենք, թե ոչ: Այս մասին Armenia Today-ի հետ զրույցում ասաց Տուրիզմի հայկական ֆեդերացիայի (ՏՀՖ) նախագահ Մեխակ Ապրեսյանը։
«Մեր ուսումնասիրոթյունները ցույց են տալիս, որ այցելություններն անհատական են, իսկ կազմակերպված տուրիզմը դեռ վերականգնման կայուն փուլի մեջ չի մտել, քանի որ քովիդից հետո տարածաշարջանում իրավիճակը կայուն չէ՝ ուկրաինական ճգնաժամով պայմանավորված, մեր սահմաններին ևս մշտական խաղաղություն չէ: Սա իր ազդեցությունն ունենում է և կազմակերպված զբոսաշրջությունը ավելի զգուշավոր է»,- ասաց Մեխակ Ապրեսյանը։
Նա ներկայացրեց այս տարվա եռամսյակի վերջին տվյալները, որոնց համաձայն՝ այս տարի առաջին եռամսյակին ներգնա զբոսաշրջային այցելությունների թիվը կազմել է 249 361, ինչը 2,9 անգամ ավելի է նախորդ տարվա նույն ժամանակահատվածի ցուցանիշից:
Նա նշեց, որ թեև բազմաթիվ երկրներից են այցելությունները, բայց կարևորեց քիչ թե շատ տեսակարար կշիռ ունեցող երկրներից այցերը: Նրա խոսքով՝ ընդհանուր այցելություններում 0,5 տոկոսը Արաբական Միացյալ էմիրություններից են, որը նախորդ տարվա համեմատ աճել է 3,7 անգամ:
«Եղել է 1287 այցելություն, ինչը շատ մեծ չէ, բայց աճը մեծ է»,- ասաց նա:
Բելառուսից այցելություններն ընդհանուրի մեջ 1,1 տոկոս են կազմում՝ 2853 զբոսաշրջիկ, իսկ աճը 3,9 անգամ շատ է եղել անցած տարվա նույն ժամանակահատվածի համեմատ:
«Իրանը մեր հիմնական շուկաներից է և ընդհանուր այցելություններում կազմել է 9,3 տոկոս, աճը անցած տարվա նույն ժամանակահատվածի համեմատ 2,5 անգամ ավելի է ու առաջին եռամսյակում կազմել է 23 291: ԱՄՆ-ից այցելուներն ընդհանուրի մեջ 1,6 տոկոս են կազմում, այցելությունների թիվը եղել է 3 917, ինչը 87 տոկոսով ավելի է նախորդ տարվա նույն ժամանակահատվածի ցուցանիշից: Ուկրաինան կազմում է ընդհանուրի 1,6 տոկոսը, 4027 այցելություն է եղել, ինչը մոտ կրկնակի է նախորդ տարվա նույն ժամանակահատվածի համեմատ:
Վրաստանն ընդհանուր այցելությունների մեջ 9,7 տոկոս է կազմում, նրանց թիվը կազմել է 24 158, աճը նախորդ տարվա նույն ժամանակահատվածի համեմատ 2,7 անգամ ավելի է: Ֆիլիպիններից այցելուները ընդհանուրի մեջ 0,8 տոկոս են կազմում՝ 2 036 այցելություն, աճը՝ 92,5 անգամ, անցած տարի ընդամենը 22 այցելություն է եղել:
Ֆրանսիան ընդհանուր այցելությունների մեկ տոկոսն է կազմում՝ 2382 այցելություն, աճը մոտավորապես երկու անգամ ավելի է նախորդ տարվա նույն ժամանակահատվածի համեմատ»,- ասաց նա:
Անդրադառնալով Ռուսաստանին՝ Մեխակ Ապրեսյանն ասաց, որ Ռուսաստանի Դաշնությունից ընդհանուր այցելությունների թիվը 108 976 է, ընդհանուր այցելությունների մեջ 43,7 տոկոսն է կազմում, իսկ նախորդ տարվա համնեմատ աճը կազմել է 3,6 անգամ ավելի, նախորդ տարի մոտ 30 հազար է եղել:
«Իհարկե, հետաքրքրությունը նույնպես Հայաստանի նկատմամբ վատը չէ, այս աճը հիմնականում ապահովել է Ռուսաստանը։ Եվրոպական երկրներից, ԱՄՆ-ից այցելություները շատ փոքրաթիվ են, դա խոսում է այն մասին, որ նրանք զգուշավոր են»,- ասաց նա:
Մեխակ Ապրեսյանը նշեց նաև, որ Ռուսաստանից այցելությունները հիմնականում պայմանավորված են ուկրաինական ճգնաժամով:
Ինչ վերաբերում է հարցին, թե ռուս զբոսաշրջիկները այցելո՞ւմ են մարզեր, Մեխակ Ապրեսյանը նշեց, որ հիմնականում Երևանում են լինում, մի մասը՝ նաև Երևանին մոտ մարզերում, և քանի որ երկար ժամանակով են Հայաստանում, ընթացքում շրջագայություններ են ունենում նաև մարզեր, թեև այդքան ակտիվ չեն:
Անդրադառնալով խնդիրներին՝ նա ասաց, որ ռուս այցելուների համար վարձով տների գներն այդքան բարձր չեն, առավել ևս երբ համեմատում ես Ռուսաստանում գործող գների հետ, և նրանց փոքր-ինչ թանկացումը շատ չի վրդովեցրել:
«Նրանց շատ է դուր եկել Հայաստանը, բոլորը շատ գոհ են մարդկանց վերաբերմունքից և այն հանգամանքից, որ այստեղ մերոնք առիթից չեն օգտվում, հյուրանոցային և այլ ծառայությունների գներ չեն բարձրացնում»,- ասաց նա:
Մեխակ Ապրեսյանը կարևորեց իրավիճակի կայունացումը, որ մտնենք կայուն վերականգնման փուլ, քանի որ Ռուսաստանից բազմաթիվ էին ստիպված այցելությունները, փոխարենը՝ հանգստի և ժամանցի նպատակով այցելությունները չեղարկվում էին, քանի որ ռուսական ռուբլին արժեզրկվում էր, ավիատոմսերի գները շեշտակի աճել էին:
«Ռուսասկան ռուբլին քիչ թե շատ սկսեց կայունանալ, արժևորվել, ինչը պետք է նպաստի Ռուսաստանի այցելությունների աճին և ավիատոմսի գներն էլ սկսեցին կայունանալ, բայց մնացած երկրներից այցելությունների համար արդեն խոչընդոտ է դոլարի և եվրոյի փոխարժեքի նվազումը: Այսինքն՝ հայկական դրամի շեշտակի արժևորումը նշանակում է, որ դոլարով և եվրոյով մեր ծառայությունների գները բարձրանում են և բացասական ազդեցություն սկսում ունենալ ներգնա զբոսաշրջության վրա»,- ասաց նա:
