Կրիպտոակտիվների օգտագործմամբ առևտուր անելու և հարկերից խուսափելու խնդիրը բազմիցս բարձրաձայնել ենք։ Այս մասին Բյուջե-2021թ․ քննարկման ժամանակ ասաց ՀՀ ՊԵԿ նախագահ Ռուստամ Բադասյանը։
Նրա խոսքով՝ արձանագրվել են օպերատիվ հետախուզական միջոցառումներ, որտեղ արձանագրվել է մեծ գումարի կանխիկի դիմաց կրիպտոակտիվի ձեռքբերման և էլեկտրոնային դրամապանակի կամ այլ միջոցների վրա կրիպտոակտիվի բացումը։ Սակայն այդ գործողությունները չեն ունեցել արդյունք, քանի որ ոլորտը կարգավորված չէ։
ՊԵԿ նախագահը նշեց, որ պետք է հասկանալ, թե ինչ են կրիպտոակտիվները, ինչ իրավական կշիռ ունեն, դրանցով գործարքները ինչպես են իրականացվում։
«Մենք բազմիցս ԿԲ-ին խնդրել ենք, որպեսզի ոլորտն անպայման կարգավորվի, որովհետև չկարգավորելով՝ մենք թույլ ենք տալիս բազմաթիվ ստվերային գործարքներ, մինչդեռ աշխարհում դրա փորձն արդեն կա»,- ասաց Բադասյանը՝ հավելելով, որ լուրջ միջոցներ են ձեռնարկում այս հարցով։