Ուրախ եմ, որ հնարավորություն է ստեղծվել արհեստավարժ մասնագետների հետ այսօր քննարկելու թերևս ամենապահանջված, ամենախորքային և ամենահեռանկարային թեմաները: Այս մասին Երևանում մեկնարկած «Գիտության և գործարարության օրեր-2022» միջոցառման շրջանակում ունեցած իր ելույթի ժամանակ ասաց ՀՀ էկոնոմիկայի նախարար Վահան Քերոբյանը՝ հատուկ շնորհակալություն հայտնելով մոլեկուլային կենսաբան, նյարդաբան, բժշկագիտության 2021թ. Նոբելյան մրցանակակիր, Scripps Research ինստիտուտի պրոֆեսոր Արդեմ Փաթափությանին` իր հրավերն ընդունելու և այսօրվա միջոցառմանը մասնակցելու համար:
«Ոգևորությունս կրկնակի է, որովհետև այսօր մեզ հետ են նաև Ռուսական տնտեսագիտական դպրոցի ռեկտոր Ռուբեն Ենիկոլոպովը, սոցիոլոգ, հրապարակախոս, Աբու-Դաբիի Նյույորքյան համալսարանի պրոֆեսոր Գեորգի Դերլուգյանը, Կանարյան կղզիների աստղաֆիզիկայի ինստիտուտի պրոֆեսոր, STARMUS փառատոնի համահիմնադիր Գարիկ Իսրայելյանը, Krisp ընկերության համահիմնադիր և տնօրեն Դավիթ Բաղդասարյանը, «Սինոփսիս Հայաստան» ընկերության նախագահ, «Սինոփսիս» ընկերության գլխավոր ճարտարագետ Երվանդ Զորյանը, ինչպես նաև «Թումո ստեղծարար տեխնոլոգիաների կենտրոնի» հիմնադիր ու տնօրեն Մարի Լու Փափազյանը և համաշխարհային ճանաչում ունեցող հայազգի այլ գիտնականներ»,- ասաց նախարարը։
Նրա խոսքով՝ աշխարհահռչակ այս մասնագետների հետ շփումները լուրջ խթան կհանդիսանան գործարարների, գիտնականների և երիտասարդ մասնագետների համար` ինչպես գործնական նոր գիտելիքների ձեռբերման, այնպես էլ հետագա հնարավոր շարունակական համագործակցության համար:
«Անհերքելի է գիտելիքահեն տնտեսության կայացման անհրաժեշտությունը յուրաքանչյուր երկրի զարգացման համար։ Հայաստանի ապագան ևս տեխնոլոգիական զարգացման, գիտելիքահեն տնտեսության կառուցումն է: ՀՀ կառավարությունը գիտելիքահեն տնտեսության կայացումը դիտարկում է որպես մեր երկրի տնտեսության զարգացման կարևոր առաջնահերթություն:
Հայաստանը ներկայումս հնարավորությունների երկիր է՝ ժամանակակից, կրթված, աշխատասեր մարդկային կապիտալով, բազմաթիվ երկրների հետ համագործակցության տարբեր ձևաչափերով:
Գործարար միջավայրում գիտահետազոտական բաղադրիչի ինտեգրման, նորարարության և գիտատար ձեռնարկատիրության խթանման և աջակցության մեխանիզմների ներդրման, ինչպես նաև տնտեսական աճի ապահովման գործում մենք հատկապես կարևորում ենք պետության և գիտություն-գործարար համայնք կապը: Պետք է ուժեղացնենք մեր գիտական հաստատությունները, համախմբենք գիտական ամբողջ ներուժը և միասին զարգացնենք մեր երկիրը։
Նշված գործընթացն առավելագույն արդյունավետությամբ կազմակերպելու և խնդիրների լուծման ճիշտ բանաձևերը գտնելու համար անհրաժեշտ է բոլորիս ջանքերի համախմբումը։
Գիտելիքի վրա հիմնված տնտեսություն կառուցելու մեր տեսլականը միանգամայն հիմնավորված է: Մենք շարունակաբար խորացնելու ենք գլոբալ տնտեսությանը ինտեգրվելու գործընթացները` աշխարհին առաջարկելով մեր մտավոր կարողությունների արգասիքը, իսկ աշխարհում հայ գիտնականների և նորարարների ներդրումները, որոնք բեկումնային են եղել մարդկության առաջընթացի համար, հայտնի են բոլորին: Մեր առաջարկն է Հայաստանը դարձնել տեխնոլոգիական կենտրոն, որտեղից մարդիկ կարող են սկսել իրենց բիզնեսը կամ կաշխատեն աշխարհի համար։
Համոզված եմ, որ «Գործարարության և գիտության օրեր-2022» միջոցառումը լուրջ խթան կհանդիսանա բիզնեսի և գիտության փոխգործակցության զարգացման, գիտության առևտրայնացման հնարավորությունների բացահայտման, նոր նախաձեռնությունների քննարկման և իրականացման համար»,- ասաց Քերոբյանը: