Ռուսաստանի խորհրդարանական պատվիրակությունն այսօր կառավարությունում քննարկել է երկու երկրների միջև առևտրատնտեսական համագործակցության ուղղությունները: Այս մասին այսօր Երևանում լրագրողներին հայտնել Է ՌԴ Պետդումայի փոխխոսնակ Ալեքսեյ Գորդեևը։
Նրա խոսքով՝ առևտրատնտեսական փոխգործակցության հարցը քննարկվել է ՀՀ փոխվարչապետ Մհեր Գրիգորյանի հետ հանդիպման ժամանակ:
Գորդեևը նշել է, որ այսօրվա դրությամբ՝ Հայաստանի և Ռուսաստանի միջև գործում է ավելի քան 200 պայմանագիր և համաձայնագիր՝ երկկողմ համագործակցության այս կամ այն ոլորտում:
«Այսօր մենք խոսել ենք այն մասին, թե ինչպես ծավալել այդ ներուժը։ Մենք ակնկալում ենք, որ երկու երկրների միջև ապրանքաշրջանառությունը կհասնի 3 մլրդ դոլարի»,- ասել է ռուս խորհրդարանականը՝ մատնանշելով նաև ներդրումների լուրջ աճի և համատեղ ձեռնարկությունների ստեղծման հնարավորություններն արդյունաբերության և գյուղատնտեսության ոլորտում:
Քննարկվել է նաև շուկաներում ապրանքների համատեղ սերտիֆիկացման հարցը, որպեսզի կողմերն այդ ապրանքներն ընկալեն որպես հայրենական արտադրության ապրանքներ: Պետդումայի փոխխոսնակը հայտնել է, որ այսօրվա դրությամբ Հայաստանում կուտակված ռուսական ներդրումների ընդհանուր ծավալը կազմում է շուրջ 40 տոկոս:
«Մեր բիզնեսն արդեն լուրջ ներկայություն ունի Հայաստանում, բայց կցանկանայի, որ ներդրումների որակը փոխվեր»,- ասել է Ալեքսեյ Գորդեևը՝ հավելելով, որ այսօր խոսքը Հայաստանում համատեղ հայ-ռուսական տեխնոպարկի ստեղծման մասին է:
Խոսելով «Վերին Լարս» անցակետի խնդիրների մասին՝ ռուս պատգամավորը հիշեցրել է ՌԴ կառավարության նախագահի որոշման մասին, որի հիման վրա երկխոսություն է ընթանում երկու երկրների Էկոնոմիկայի նախարարությունների միջև: Նա նշել է, որ մոտ ժամանակներս անցակետերի թողունակությունը լրջորեն կընդլայնվի։
Հայաստանի վիճակագրական կոմիտեի տվյալների համաձայն՝ Հայաստանի և Ռուսաստանի միջև արտաքին առևտրաշրջանառությունը 2022 թ. հունվար-ապրիլին աճել է 36,8% -ով՝ կազմելով 903,4 մլն դոլար։