Armenia Today-ն սկսում է մի շարք, որով կպատմի ստարտափերի, դրանց հեղինակների ու նոր ծնվող հետաքրքիր գաղափարների մասին: Մեր առաջին հյուրն Ամալյա Հարությունյանն է:
Ամալյա Հարությունյանը 21 տարեկան է, մասնագիտությամբ՝ հոգեբան։ 2017 թվականից հաշմանդամություն ունեցող անձանց իրավունքների պաշտպանությամբ է զբաղվում։ Ամալյա Հարությունյանն ու իր թիմը ստեղծել են «Հավասար» կրթական հավելվածը, որը նախատեսված է տարրական դասարաններում սովորող աշակերտների համար։ Այն հարմարեցված կլինի հաշմանդամություն ունեցող աշակերտների համար։ Armenia Today-ի հետ զրույցում Ամալյան պատմել է, թե ինչպես է ստեղծվել հավելվածը, խոսել «Հավասար»-ի հնարավորությունների ու հիմնական գործառույթների մասին։
«Ինքս տեսողության խնդիր ունեմ, սովորել եմ հանրակրթական ներառական դպրոցում։ Բախվելով բազմաթիվ դժվարությունների՝ որոշեցի որևէ բան փոխել, ինչի արդյունքում ծնվեց «Հավասար»-ը։ Այն կրթական հավելված է, որը նախատեսված է լսողական, տեսողական ու մտավոր խնդիրներ ունեցող երեխաների համար։ Մեր թիմն աշխատանքները սկսել է դեռևս 2020 թվականին։ Երբ բոլորը կարանտինի մեջ էին, մենք մասնակցում էինք «Դասավանդի´ր, Հայաստան» հիմնադրամի «Կայծ» սոցիալական նորարարությունների ինկուբատորի դասընթացների փուլին։ Այդ փուլից հետո մեր աշխատանքը ժյուրիին ներկայացնելու հնարավորություն ունեցանք։ Ընտրության արդյունքում 35 թիմերից այդ հնարավորությունը ստացան 13-ը։ Հինգ հաղթողների թվում նաև մեր թիմն էր։ Դրանից հետո մենք սկսեցինք ստեղծել հավելվածի նախնական գործառույթները, և առաջին դասարանի երեխաների համար նախատեսված Այբբենարանի ու մաթեմատիկայի նյութը»,- մեզ հետ զրույցում պատմեց Ամալյան։
Նա նշեց, որ իրենց թիմը մասնակցել է վերջերս Դիլիջանում տեղի ունեցած «Buissup Global Forum»-ին, որին մասնակցում էին ֆորումի կազմկոմիտեի կողմից ընտրված երիտասարդական սկսնակ նախագծերի թիմեր:
Հիշեցնենք, որ ֆորումի մասնակիցները կարողացան անմիջականորեն շփվել 25 հրավիրված առաջատար բիզնես փորձագետների հետ և աշխատել իրենց նախագծերի որակի վրա, բարձրացնել նրանց գրավչությունը պոտենցիալ ներդրողների համար:
«60 թիմ էր մասնակցում ունեցած «Buissup Global Forum»-ին։ 7 հաղթողներից մեկը դարձանք, որոնք պետք է ներդրում ստանան իրենց նախագծերի համար»,- ասաց Ամալյան։
Խոսելով հավելվածի մասին՝ նա նշեց․
«Հավասարը» հեռախոսային հավելված է՝ app, որը հարմարեցված է տեսողական, լսողական ու մտավոր խնդիրներ ունեցող երեխաների համար։ Հավելվածում այլ ֆորմատով կրթական նյութեր են լինելու։ Մասնավորապես՝ լսողական խնդիրներ ունեցող երեխաների համար ադապտացված, ժեստերի լեզվով տեսադասեր են լինելու, տեսողական խնդիրներ ունեցողների համար՝ ադապտացված աուդիոդասեր, իսկ մտավոր խնդիրներ ունեցող երեխաների համար՝ գրաֆիկական լուծումներով տեսադասեր, պարզեցված խաղեր, վարժություններ։ Հավելվածը նաև վարժություններ լուծելու հնարավորություն է տալիս։ Հետագայում բաժանորդագության միջոցով նաև շատ այլ գործառույթներ կունենանք։ Բացի այդ, ծնողների համար խորհրդատվություն է նախատեսվում, կլինեն առաջադիմություն չափելու գործիքներ, երեխայի համար անհատական զարգացման խաղեր և այլ գործիքներ, որոնք անհրաժեշտ են տարբեր խնդիրներ ունեցող երեխաներին։ Մեր հանրակրթական դասագրքերի նյութերը միշտ անվճար են լինելու, սակայն խաղերի և այլ գործիքների համար սիմվոլիկ վճար կլինի՝ բաժանորդագրության ձևով»։
Ամալյան նշեց, որ հավելվածը դեռևս հանրային չէ։ Նրա խոսքով՝ այն հասանելի կլինի մի քանի օրից՝ Play Market և App Store համակարգերում։ Սեպտեմբերի 24-ին տեղի կունենա հավելվածի շնորհանդեսը։
«Թեպետ հավելվածը դեռ հասանելի չէ, բայց արձագանքներ արդեն եղել են։ Մենք մեկ-երկու անգամ տեսողության խնդիրներ ունեցող երեխաների հետ հատուկ դպրոցներում փորձել ենք։ Հետաքրքիր արձագանքներ ենք ստացել նաև կրթության փորձագետներից։ Նրանք նշում էին, որ նյութն օգտակար է ոչ միայն խնդիրներ ունեցող երեխաների, այլև այն բոլոր աշակերտների համար, որոնք որևէ կերպ հետ են մնացել դասերից։ Մենք հասկացանք, որ հավելվածը լուծելու է այն խնդիրը, որի համար ստեղծվել է։ Խոսքը նաև դասերին մատչելիության բացակայության խնդրի մասին է, որը ևս լուծվում է»,- եզրափակեց Ամալյան։
Armenian Business Forum 2021-ի շրջանակներում Buissup Global Forum-ի բոլոր հաղթողները ստացել են դրամական պարգևներ: Armenian Business Forum 2021-ը տեղի է ունեցել «Tashir group»-ի ֆինանսավորմամբ:
