Գորիսի քաղաքապետի տեղակալ Իրինա Յոլյանին ձերբակալելու քննիչի արձանագրությունը կազմվել է ոչ իրավաչափ ձևով։ Այս մասին լրագրողների հետ ճեպազրույցում հայտարարեց նրա փաստաբան Էրիկ Ալեքսանյանը։
Նա Իրինա Յոլյանի ձերբակալությունը համարում է ոչ իրավաչափ, մեղադրանքն էլ չեն ընդունում, հրաժարվել են ցուցմունք տալ։
Փոխքաղաքապետին մեղադրանք է առաջաջադվել Քրեական օրենսգրքի 179 հոդվածի մասով, որը ներկայացնում է յուրացման և վատնման հանցակազմը։
«Պայմանականորեն ընդունենք, որ կարգը խախտել է, և օգնություն է տրամադրվել ոչ կարիքավոր մարդկանց, և եթե կա կարգի խախտում, այն իր մեջ կարող է պարունակել կարգապահական զանցանքի հատկանիշներ, տվյալ դեպքում ինչպե՞ս է վարույթ իրականացնող մարմինը տվել սահմանումը կարգապահական զանցանքի և հանցագործության։ Քաղաքացիների դիմումների համաձայն են տվել գումարները։ Նրանք գրել են, որ կարիքավոր են։ Փոխքաղաքապետը գումարն իր գրպանը չի դրել, քաղաքացիներին է բաժանել։ Այդ քաղաքացիների հետ փոխքաղաքապետը բարեկամական կապ չունի։ Գործ ունենք իրավիճակի հետ, որ օգնություն տալու համար անձին պետք է մեղադրանք առաջադրե՞ն և դատապարտե՞ն»,– նշեց պաշտպանը։
Էրիկ Ալեքսանյանը նկատեց, որ Իրինա Յոլյանը միշտ քննադատել է իշխանությանը։ Նրա խոսքով՝ հաճախ ենք ականատես լինում, որ ովքեր քննադատում են իշխանությանը, կարճ ժամանակ անց գտնվում են անազատության մեջ, կամ նվազագույնը ձեռք են բերում մեղադրյալի կարգավիճակ։
Նշենք, որ դատարանը քննում է Գորիսի փոխքաղաքապետ Իրինա Յոլյանի կալանավորման հարցը։
Հիշեցնենք, որ Գորիսի փոխքաղաքապետ Իրինա Յոլյանը և Մենուա Հովսեփյանը ձերբակալվել են։