Արմեն Սարգսյանի վերաբերյալ «Հետք»-ի հրապարակումն ուղարկվել է ԱԱԾ, որտեղ նրա երկքաղաքացիության փաստաթղթերի իրավաչափության վերաբերյալ քրգործ կա։
Այս մասին Armenia Today-ին հայտնել է գլխավոր դատախազի խորհրդական Գոռ Աբրահամյանը։
«Գլխավոր դատախազությունում իրականացվող ԶԼՄ-ների և համացանցի մոնիթորինգի արդյունքում հրապարակումը վեր է հանվել, ուսումնասիրվել է Գլխավոր դատախազությունում և ուղարկվել ԱԱԾ՝ նկատի ունենալով, որ այնտեղ գտնվում է քրեական գործ՝ հարուցված Արմեն Սարգսյանի երկքաղաքացիության փաստաթղթերի իրավաչափության վերաբերյալ։ Հրապարակումն ուղարկվել է ԱԱԾ՝ այդ գործի շրջանակներում հրապարակման մեջ ներկայացված հանգամանքները, տվյալները ստուգելու նպատակով»,- ասաց նա։
«Հետք» պարբերականը, հղում անելով Կոռուպցիայի և կազմակերպված հանցավորության լուսաբանման նախագծին, երեկ հետաքննություն էր հրապարակել, որի համաձայն՝ Արմեն Սարգսյանը Հայաստանի քաղաքացի լինելուց բացի, նաև այլ երկրի քաղաքացի էր առնվազն մինչև նախագահ դառնալը:
Հիշեցնենք, որ ըստ «Հետք»-ի՝ Սարգսյանը Կարիբյան ծովում գտնվող փոքր երկրի՝ Սենթ Քիթս և Նևիսի քաղաքացի է եղել: «Հետքի» տեղեկության համաձայն՝ նախագահն ուներ Սենթ Քիթս և Նևիսի անձնագիր, ինչը հաստատվել է Սարգսյանի հետ նամակագրության ընթացքում: Սահմանադրության համաձայն՝ Հանրապետության նախագահին ներկայացվող պահանջներից է վերջին վեց տարում միայն Հայաստանի Հանրապետության քաղաքացի լինելն ու վերջին վեց տարում Հայաստանում մշտապես բնակվելը:
