Ուշադրություն` 3-րդ օրն է, ինչ Ավետիք Չալաբյանի կալանավորման որոշումը չենք ստացել:
Այս մասին Facebook-ի էջում գրել է նրա պաշտպան Վարազդատ Հարությունյանը։
«Երևի չեն կարողանում գրեն, ի՞նչ գրեն, ի՞նչ հիմք դնեն: Գրեն, որ Ավետիք Չալաբյանը կարող է փախուստի դիմել, որ մինչև հուլիսի 1-ը չնստի, թե գրեն, որ ձայնագրությունը 3 օր էր, ինչ հրապարակված էր, սակայն Ավետիքին հայտնաբերել են ոչ թե անտառներում թաքնված, այլ իր հաշվառման հասցեում, այն էլ՝ քնած:
Անուն առ անուն մտցնելու ենք ձեզ պատմության մեջ»,- նշել է փաստաբանը։
Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 163-րդ հոդվածի 3-րդ մասի 2-րդ կետի հատկանիշներով հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ:
«Հիշյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դատասխոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:
Կատարված նախաքննությամբ պարզվել է, որ ենթադրյալ հանցագործությունը կատարած անձինք քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:
Քրեական գործի նախաքննության ընթացքում վերոհիշյալ հանցավոր արարքը կատարելու կասկածանքով ձերբակալվել է Երևան քաղաքի բնակիչ, «5165» շարժման անդամ Ավետիք Չալաբյանը: