Արագածոտնի մարզի աղմկահարույց կրակոցների ու սպանությունների փաստով կասկածյալի երևանյան տանը խուզարկությամբ հայտնաբերվել է կանեփանման զանգված, որսորդական փամփուշտներ, որոնցից մեկը՝ կրակված վիճակում։ Այս մասին հայտնում է Shamshyan.com-ը։
Կայքի տեղեկություններով՝ Հայաստանի քննչական կոմիտեի հատկապես կարևոր գործերով քննության գլխավոր վարչության Մարդու դեմ ուղղված հանցագործությունների քննության վարչությունում քննվող ՀՀ քրեական գործի շրջանակում հատկապես կարևոր գործերով ավագ քննիչը միջնորդություն է ներկայացրել Երևան քաղաքի ընդհանուր իրավասության դատարան, որպեսզի դատարանը խուզարկության թույլտվություն տա Երևան քաղաքի Եղիազարյան փողոցի տներից մեկում։
Ինչպես հայտնում է աղբյուրը, դատարանը բավարարել է քննիչի միջնորդությունը և խուզարկությամբ նշված բնակարանը, որը պատկանում է հունիսի 19-ին Արագածոտնի մարզի Նիգավան գյուղում կրակոցների հետևանքով 2 քաղաքացու սպանության փաստով կալանավորված 33-ամյա Արմեն Հովհաննիսյանին, խուզարկվել է։
Աղբյուրի տեղեկություններով՝ խուզարկությամբ հայտնաբերվել է 3.31 գրամ կշռով կանեփանման զանգված և 3 հատ 12 մմ տրամաչափի որսորդական փամփուշտ, որոնցից մեկը եղել է կրակված վիճակում։
Ավելի վաղ հայտնի էր դարձել, որ հունիսի 23-ին Հայաստանի քննչական կոմիտեի Արագածոտնի մարզային քննչական վարչության պետ Սամվել Սիմոնյանի որոշմամբ քննչական խմբի ղեկավար նշանակված, նույն վարչության հատկապես կարևոր գործերով ավագ քննիչ Ստեփան Սուքիասյանը միջնորդություն էր ներկայացրել Երևան քաղաքի ընդհանուր իրավասության դատարան (նստավայրը՝ Մալաթիա-Սեբաստիա), որպեսզի դատարանը՝ որպես խափանման միջոց, երկամսյա կալանքի որոշում կայացներ Երևանի բնակիչ՝ 33-ամյա Արմեն Հովհաննիսյանի նկատմամբ:
Վերջինս կասկածվում էր Արագածոտնի մարզի Նիգավան գյուղում տեղի ունեցած վիճաբանության ժամանակ սպանություն կամ սպանություններ կատարելու մեջ:
Դատավոր Արմեն Պողոսյանը, դռնփակ դատական նիստն անցկացնելուց և խորհրդակցական սենյակից վերադառնալով, բավարարել էր քննիչի միջնորդությունը և Ա. Հովհաննիսյանը դատարանից տեղափոխվել էր ՀՀ արդարադատության նախարարության քրեակատարողական ծառայության քրեակատարողական հիմնարկ: