Այսօր Հայաստանում մարդիկ մահանում են իրենց քաղաքական հայացքների համար։ Այս մասին Armenia Today-ի հետ զրույցում ասաց ԱԺ «Հայաստան» խմբակցության պատգամավոր Թադևոս Ավետիսյանը։
Նրա խոսքով՝ կառավարության գործունեության հետևանքով ՀՀ-ն ոչ միայն կորցնում է իր ինքնիշխանությունը, իր տարածքներն, այլ նաև զոհվում են քաղաքացիները։
«Մարդիկ նաև մահանում են իրենց քաղաքական հայացքների համար, բռնաճնշումների են ենթարկվում, ապօրինի ձերբակալվում են։ Իշխանությունն իր արյունոտ ձեռքերը պետք է հեռու քաշի այս երկրից, ՀՀ քաղաքացիներից»,- նշեց նա։
Ընդդիմադիր պատգամավորի պնդմամբ՝ շարունակելու են իրենց պայքարը, քանի որ հայը պետք է ապրի իր բնօրրանում։
Հիշեցնենք, որ «Դիմադրության» շարժման անդամներն ի պաշտպանություն քաղբանտարկալների իրենց բողոքի ձայնն են բարձրացրել ՄԱԿ-ի երևանյան ներկայացուցչության մոտ՝ պահանջելով երկակի ստանդարտներ չկիրառել և աչք չփակել քաղաքական հայացքների համար իշխանության կողմից կիրառվող բռնաճշումների վրա։
Այնուհետև, ակցիայի մասնակիցները քայլերթով շարժվել են դեպի Կառավարության շենք, որտեղ տեղի է ունեցել բողոքի ակցիա՝ ի հիշատակ հասարակական գործիչ Արմեն Գրիգորյանի։
Հիշեցնենք նաև, որ Երևանի ընդհանուր իրավասության դատարանի «Կենտրոն» նստավայրում պրոդյուսեր Արմեն Գրիգորյանի գործով նախնական դատալսումների ժամանակ նրա ինքնազգացողությունը վատացել է, Գրիգորյանը կորցրել է գիտակցությունը:
Դատարան ժամանած շտապօգնության բրիգադին չի հաջողվել փրկել Գրիգորյանի կյանքը:
Հավելենք, որ Արմեն Գրիգորյանը ձերբակալվել է ՀՀ քրեական օրենսգրքի 226.2-րդ հոդվածով (Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը): Կալանքի տակ էր մայիսի 18-ից: