Վարչապետ Նիկոլ Փաշինյանն զբաղեցրած պաշտոնից ազատել է Արդարադատության նախարարության ենթակայության տակ գտնվող մի քանի պաշտոնյայի։
Վարչապետի որոշմամբ՝ Ամբակում Գրիգորյանն ազատվել է Քրեակատարողական ծառայության պետի ժամանակավոր պաշտոնակատարի պաշտոնից։ Գրիգորյանը նշանակվել էր 2023 թվականի դեկտեմբերի 18-ին։
Պրոբացիայի ծառայության պետ Արամ Նիկոյանը վարչապետի որոշմամբ ազատվել է զբաղեցրած պաշտոնից, որը ղեկավարել է 2023 թվականի սեպտեմբերի 18-ից։
Արսեն Մնացականյանն ազատվել է ԴԱՀԿ պետի պաշտոնից։ Մնացականյանն այս պաշտոնում նշանակվել էր 2023 թվականի հունվարի 26-ին։
Փաշինյանը նոյեմբերի 15-ին կառավարության նիստում քննադատել էր իրավապահ մարմինների աշխատանքը և ասել, որ իրեն չի բավարարում երկրում տիրող հանցավորության մակարդակը, իր «համբերության բաժակը լցվել է», և ինքը կկատարի համապատասխան որոշումներ։ Վարչապետի քննադատությանը հաջորդել էր նոյեմբերի 18-ին իրավապահ մարմինների մի քանի բարձրաստիճան պաշտոնյաների հրաժարականը։
Հրաժարական էին տվել Բարձրագույն դատական խորհրդի նախագահ Կարեն Անդրեասյանը, Քննչական կոմիտեի ղեկավար Արգիշտի Քյարամյանը, ՊԵԿ նախագահ Ռուստամ Բադասյանը, Հակակոռուպցիոն կոմիտեի ղեկավար Սասուն Խաչատրյանը և ՆԳ նախարար Վահե Ղազարյանը։ Իր պաշտոնը լքել էր նաև Տարածքային կառավարման և ենթակառուցվածքների նախարար Գնել Սանոսյանը։
Նոյեմբերի 18-ին Փաշինյանը նշել էր Հայաստանի բարձրաստիճան պաշտոնյաների հրաժարականների պատճառը։ Նոյեմբերի 22-ին վարչապետը ներկայացրել էր պաշտոնյաների վերջին հրաժարականների մանրամասները և հաստատել, որ դրանք կատարվել են SMS հաղորդակցության միջոցով։ Նա կադրային փոփոխություններն անվանել էր «ոչ թե հակասական, այլ աշխատանքային»՝ նշելով, որ բարձր է գնահատում պաշտոնաթող պաշտոնյաների աշխատանքը։
